Александар Тодоров (43) е промовиран во наследник на Анте Назор на клупата на МЗТ Скопје. Екс предводникот на младата кошаркарската репрезентација на Македонија потпиша едногодишен договор со управата на „металците“.
Тодоров и МЗТ Скопје ќе соработуваат по четврти пат. Првиот предизвик со аеродромци го прифати во 2000 година, вториот во 2007 година, а во третиот имаше и најголем успех. Под негово водство, во сезоната 2011/12, „сино-белите“ од СЦ „Јане Сандански“ ја освоија премиерната шампионска титула во домашната сцена во клупската историја. Со „металците“ има освоено и два македонски купа (2001 година и во 2012 година), а во 2009 година го одведе Рилски Спортист до тронот во БИБЛ лигата. Како тренер работеше и во Алумина, Куманово, Вардар, Анкара Баскет, Балкан Ботевград, Динамо Букурешт и Пеќ.
Овојпат се соочува со креација и на конкурентен тим за наредната сезона во која екипата ја очекуваат настапи во првенството, Купот и во АБА лигата. Марко Симоновски, Адем Мекиќ и Ксавиер Темс се единствените тројца играчи што во моментот се под договор со клубот. Тодоров за почеток ќе има на располагање и неколкумина од младинскиот погон како Мартин Милевски, Леонид Тодоровски, Дамјан Миса, Петар Прентовиќ и Андреј Настевски, но амбициите сигурно ќе се однесуваат на атак на двојната круна дома и на играње важна улога во јадранското кошаркарско друштво. А, за тоа, покрај младост, е потребно и искуство и квалитет на сите позиции.