По писмото на европратениците до Претседателот Иванов, и Парламентарното собрание на Советот на Европа потпиша Декларација против новиот закон за абортус. Потпишаните членови на Парламентарното собрание истакнуваат дека законот ги повредува меѓународните стандарди.
Иако со декларацијата целосно ја признаваат независноста на државата, тие изразија загриженост за начинот на кој е донесен законот.
„Без некоја посебна ургентност законот беше донесен во брза постапка, за време од 2 недели, со што беше оневозможена било каква консултација и јавна дебата со главните чинители, како медицинските експерти, женските организации и граѓанското општество. Ова предизвика загриженост во однос на заложбите на Република Македонија за демократијата и владеењето на правото.
Овој закон не е во согласност со ниту еден од меѓународните или Европските стандарди во однос на прекин на бременоста, репродуктивните права или основните слободи (Водичите на Светската Здравствена Организација, Резулициите на Собранието 1399 (2004), 1607 (2008)“, се вели во Декларацијата.
Потписници на овој документ се вкупно 20 членови на Парламентарното собрание, кои ја повикуваат владата да се повика на меѓународните стандарди во рамките на оваа легислатива.