Од година во година Македонците купуваат се помалку храна, ова го покажува последната публикација на Заводот за статистика за потрошувачката на домаќинствата за 2012 година кои потрошувачката ја споредуваат со 2010 година, но ако истата се спореди со 2005 година податоците се уште позастрашувачки.
Се намалила употребата на речиси сите прехрамбени производи, со исклучок на краставиците и копмпирите, а зголемена е и употребата на свинска маст на сметка на другите маснотии.
Едно просечно четиричлено семејство во 2012 можело да си дозволи 273 килограми леб, што е 8 килограми помалку од 2010 година и дури 40 килограми помалку од 2005 година.
Дури 100 килограми помалку брашно семејствата потрошиле лани споредено со 2005.
Во однос на 2007 година, пораснала единствено потрошувачката на компири – 105 килограми годишно, но истото семејство во 2005 можело да си купи 128 килограми компири годишно. Слично е и со оризот, односно едно семејство лани можело да си дозволи 25 килорами ориз или 11.5 килограми помалку од 2005 година.
Застрашувачки се податоците во однос на конзумирањето овошје, зеленчук, месо, млеко и јајца.
Во 2012 просечното семејство купило 30 килограми домати помалку од 2005 и 28 килограми помалку пиперки во однос на истата година.
Речиси и да нема зеленчук и овошје каде потрошувачката по семејство на годишно ниво не е намалена десетици килограми во однос на 2005 година. На пример, четворица дома изеле само по килограм и половина цреши цела година.
Потрошувачката на месо, риба и преработки од место е исто така драстично намалена, иако податоците говорат дека македонските семејства речиси и никогаш немале доволно за јагнешко, риба, телешко и другите видови кои нутриционстите ги сместуваат во здрава исхрана. Само 1, 5 килограми јагнешко годишно можело да си дозволи просечното семејство лани, додека во 2005 имале можност да купат 3 килограми јагнешко месо.
Од риба четворица дома купиле само 15 килограми во текот на 2012 година, 19 килограми во текот на 2010 година, а во 2005 можеле да си дозволат 7 килограми повеќе од лани.
Помалку пари имало дури и за кафе. Лани просечното семејство испило 9 килограми кафе, додека во 2005 година 12 килограми. Се испиле о 20 литри помалку пиво во однос на 2005 година, четири литри помалку вино.
Најдрастичен пад има кај млекото, речиси 70 колограми помалку млеко во однос на 2005 година кога четворица на годишно ниво купувале во просек по 210 литри млеко, споредено со лани кога купиле 134 литри.
Едно просечно четиричлено семејство во 2012 година на располагање имало 328.444 илјади денари годишно, а во просекот на вработен човек по семејство изнесувал 1.04 проценти.
На оваа фотографија може да се погледне табелата од Заводот за статистика за куповната моќ во 2012 споредено со 2010 година.
