Пратениците од власта и опозицијата, членови на собраниската Комисија за европски прашања едногласно ја усвоија предлог-декларацијата за забрзување на реформските и интегративните процеси за зачленување на Република Македонија во ЕУ и во НАТО.
Во документот се наведува дека се потврдува натпартиската сплотеност околу заедничките напори за обезбедување позитивна клима за реализирање на стратешката определба за членство во ЕУ и во НАТО. Исто така, се поттикнува Владата на доследно, неодложно и итно спроведување на итните реформи. Комисијата со документот, исто така, бара заложба за независно судство, транспарентност и ефикасност на судовите, професионализација на администрацијата, зајакнување на регулаторните тела, како и на социјалната кохезија и меѓуетничките односи и унапредување на односите со соседството.
Документот ќе биде испратен до Европскиот парламент (ЕП), претседавачот со Советот на министри на ЕУ, претседателот на Европски совет, генералниот секретар на НАТО, како и до претседателот на Европската комисија и до земјите членки на ЕУ.
Планот „3-6-9“ пред пратениците и амбасадорите го претстави премиерот Зоран Заев. Тој рече дека Имаме шанса да ја извлечеме земјава од криза а за тоа има поддршката од земјите членки на Европската Унија.
„Заев рече дека во првите три месеци ќе бидат спроведени реформите кои ќе овозможат Европската Комисија да го отстрани условот од препораката за отпочнување на преговорите за влез во Унијата. Реформите во правосудството, администрацијата, успешната кохабитација со претседателот на државата ќе бидат првите чекори што ќе ги преземе неговата Влада и ја побара поддршката од опозицијата.
Претседателот на Собранието, Талат Џафери рече дека овој план произлегува од Договорот од Пржино, како и од Владината програма за 2017-2020 година. Тој рече дека има и конкретен дел со конкретни мерки кои се однесуваат на работата на Собранието.
Тој рече дека планот познат како „3-6-9“, како и Владината програма 2017-2020, се добра основа за создавање на вистинска инклузивност помеѓу сите парламентарни политички субјекти.
Вицепремиерот за евроинтеграции, Бујар Османи најави 73 мерки во првиот дел од планот. Мал дел од тие може да спроведе Владата, рече тој, додавајќи дека најголемиот дел зависат од волјата на институциите.
Илија Димовски, координатор на една од пратеничките групи на ВМРО-ДПМНЕ рече дека тие ја поддржуваат декларацијата, но не и „Планот 3-6-9“.
Димовски побара увид во Договорот за добрососедство со Бугарија, а во однос на владиниот акциски план рече дека опозицијата ќе работи конструктивно.
Тој, исто така, побара во декларацијата да се вметне точка со која ќе се бара почитување на пресудата на Меѓународниот суд на правдата во Хаг во евроатлантските интеграции на земјата.
Димовски рече дека владиниот план „3-6-9“ не е ништо поинаков од плановите што претходната влада ги правела по секој извештај на Европската комисија, но за разлика од сега, тогашната влада во изработката на плановите ги вклучувала и опозицијата и другите партии.
„Бидејќи во составот на оваа влада имате министри од претходниот состав, можат да ве поучат“, рече Димовски, додавајќи дека ќе поддржат дел од владиниот план, односно сето тоа што е за доброто на граѓаните.