Српскиот претседател Александар Вучиќ изјави дека Србија го признава уставното име на Република Македонија и покрај признавањето на Косово.
– Србија тоа го призна, иако Македонија ја призна независноста на Косово, што сигурен сум беше спротивно на волјата на нејзиното население, изјави Вучиќ на прашање на Македонската телевизија, во Вашингтон по средбата со американскиот потпретседател Мајк Пенс.
Изјавата на Вучиќ доаѓа откако српскиот министер за надворешни работи Ивица Дачиќ во Атина изјави дека Србија направила грешка што го признала македонското уставно име.
За време на трилатералната средба во Солун со грчкиот и со бураскиот премиер минатата недела, Вучиќ одби да ја коментира изјавата на Дачиќ и рече дека нема намера да го демантира или осуди.
На получасовната средба меѓу српскиот претседател и американскиот потпретседател во Белата куќа било разговарано за отворените прашања на Балканот, вклучително и за спорот со името на Македонија, статусот на Косово и ситуацијата во Босна и Херцеговина. Американскиот потпретседател изразил загриженост за руското влијание во регионот и истакнал дека новата американска администрација поддржува економска соработка меѓу балканските држави.
– Мислам дека добро се разбравме. Реков дека Србија се наоѓа на европскиот пат, а Америка тој пат го поддржува. Србија има пријателски односи со Руската федерација, но и со други држави, изјави Вучиќ, не сакајќи да открива други детали.
Пенс на 2 август доаѓа во Подгорица на средби со лидерите во регионот.