Апелација ги објави одлуките за одбивањето на мерките притвор за обвинетите во „Титаник“, меѓу кои за врвот на опозициската партија Никола Груевски, Миле Јанакиески, Гордана Јанкулоска, Мартин Протоѓер и Кирил Божиновски.
Во образложението на одлуката за Груевски пишува дека со оглед на фактот што на обвинетиот му е одземена патната исправа и службениот пасош и мора секој петок да се јавува ву судот, се елиминира опаноста од бегство. Дополнително, пишуваат судиите во одлуката, податоците за оваа мерка на претпазливост се внесуваат во комјутерската евиденција на МВР, поради што и со лична карта, обвинетиот не може да оствари излез од државата.
-Паричните средства кои ги поседува обвинетиот на што укажува Обвинителството како можност за бегство за обвинетиот надвор од државата, овој суд цени дека не можат да се земат изолирано, туку во склоп со личните и семејните прилики на обвинетиот, пишува во одлуката.
Според судиите, можноста Груевски да влијае врз сведоци е апстрактна и непоткрепена, а според Апелација “не е доволно само да се истакне апстрактна можност за влијание, туку потребно е да се наведат особено конкретни околности кои го потврдуваат постоењето на оваа опасност, како што образлага и првостепениот суд“.
Во петокот на јавна седница обвинетите си ги побараа назад одземените пасоши и ветија дека нема да бегаат. Тие се жалат дека судот им определил престрога мерка. Ги оценија обвиненијата на СЈО како „празни“ и тврдат дека ова обвинителство прави политичка хајка против ВМРО-ДПМНЕ.
Во случајот „Титаник“ СЈО гони поранешни високи функционери на ВМРО-ДПМНЕ за изборни нерегуларности: вметнување лица во Избирачкиот список, издавање лични карти и пасоши за гласање на лица кои не живеат на територија на земјава, а кои добивале адреси, заплашувања на гласачи…
-Целата акција се реализирала преку МВР заедно со лица ангажирани да врбуваат лица, да носат од странство и да преку насилство пред и за време на изборна кампања за влијаат врз нивното гласање. Припадниците на злосторничкото здружување нуделе подароци, со намера да придобијат гласачи,а освен тоа и незаконски ја финансирале изборната кампања на партијата, објаснија обвинителите од СЈО на прес конференцијата во февруари лани, кои случајот го нарекоа изборна измама за опстојување на власт.