Денеска во судот завршија излагањата на завршните зборови на одбраната во случајот „Ровер“ каде обвинет е поранешниот лидер на Обединети за Македонија Љубе Бошковски и уште 14 луѓе, од кои четворицата првообвинети се во бегство, а Обвинителството во своите завршни зборови го повлече обвинението за петорица инспектори на МВР поради немање докази.
Потресен беше настапот на обвинетиот инспектор Гоце Митровски чии завршни зборови предизвикаа емоции во судницата, а неговата сопруга се расплака. Митровски зборуваше за неговата кариера од 22 години, неговата работа на важни случаи како атентатот на претседателот Киро Глигоров, скромниот семеен живот и горчината која ја чувствува по толку години служба во полицијата поради, како што вели неправдата која му се нанесува.
Гоце Митровски е обвинет за помагање на убиство. Обвинителката во актот пишува дека таа ноќ пред 11 години тој и Орце Коруновски, кој сега е мртов и на кој не може да му се суди за убиството на Марјан Тушевски се возеле заедно. Интересно е што Митровски самиот пред истражен судија раскажал дека таа ноќ се сретнал со обвинетиот бидејќи во тоа време работел како инспектор оперативец на тајни задачи и дека за тоа постојат и службени белешки кои тој ги доставил веднаш по средбата, по што обвинителката врз основа на неговиот исказ го составила и обвинителниот акт од само четири реченици, како што велат од одбраната. Во текот на процесот Судот без образложение ја одби одбраната да ги приложи службените белешки на судењето како доказ.
>>Семејството на Тушевски бара отштета од 5,4 милиони денари
>>Бошкоски: Политички затвореник како Тимошенко
„Која е мојата улога во овој случај, зарем тој што прикрива убиство остава зад себе пишана трага, документ, службена белешка. Се што имате против мене е исказ на лажен заштитен сведок и никаков материјален доказ, и тоа сведок кој тврди дека ме чул како со другите обвинети во кафеана заговарам убиство. И тој тоа го чул од другата маса во полна кафеана. Па зарем во кафеана полна луѓе ќе заговарам убиство уште и да чујат од другите маси?“, рече Митровски.
Митровски е последниот обвинет кој денеска даваше завршен збор. На минатото рочиште исказ даде и Љубе Бошковски чија одбрана побара судот да го отфрли обвинението за кое обвинителството го товари него, а е поврзано со помагање на убиството на Марјан Тушевски и Киро Јанев во 2001 година.
Адвокатот на Бошкоски, Дончо Наков, зборуваше за, според него, правните пропусти на обвинението. Тој посочи дека според зборовите на обвинителката единствено причина поради која што на обвинителна клупа не е Орце Коруновски е тоа што е мртов, инаку и него ќе му се судело, како поттикнувач на убијците кои А Бошкоски според обвинителката бил психолошки помагагач на поттикнувачот-
„Значи ако Орце е поттикнувач, Бошкоски е помагач на поттикнувачот, а обвинетиот Зоран Трајчевски е помагач на помагачот на потикнувачот, а останатите обвинети оперативци кои биле на терен биле помагачи на помагачот на помагачот на поттикнувачот, па така имаме дедото за репката, бабата за дедото и се така натаму – рече адвокатот Наков, а пренесе ПлусИнфо.
Пресудата ќе биде соопштена следниот петок, на 12 Јули во 13 часот во Основниот суд 1.