Со цел да оддавање почит кон хероите кои ги положија своите животи, а кои се автори на Крушевскиот манифест, собранискиот спикер, Талат Џафери од Мечкин Камен во Крушево, својот говор го започна со цитат од Манифестот, а кој упатува на соживот.
Како што рече Џафери, токму водачите на Илинденското востание, Никола Карев, Гоце Делчев, Даме Груев имале висока развиена свест за соживот меѓу граѓаните без разлика на нивната вера, етничка припадност, пол и социјален статус.
– Сите треба да бидеме горди што нашите предци зборувале и се бореле за слобода, за почитување на човековите права, за мултикуклтурано и мултиетничко општество. Да не заборавиме, историјата на своевиден начин ја детерминира сегашноста. Со мотивација и завет Македонците, Албанците, Турците, Бошњаците, заедно со пушка во рака се бореле и се избориле против фашизмот, за слобода. Духот на Крушевскиот манифест се материјализира и во нашиот втор Илинден, во АСНОМ, во документи во кои се дефинирани мултикултурниот и мултиетничкиот карактер на нашата држава како и човековите права. Константата во Крушевскиот манифест за мултукултурниот и мултиетничкиот карактер е втемелена и во Уставо, рече Џафери.
Претседателот на Собранието потенцираше дека најважно е што политичките кризи не го нарушиле духот за соживот и покрај различностите кај граѓаните во Македонија и иднината на оваа земја, Република Македонија, треба заедно да ја зачуваме за нас и за идните поколенија.
– Мнозинството граѓани споделуваме една заедничка определба, а тоа е целосна интеграција во ЕУ и НАТО. За жал на патот на остварување на нашите стратешки определби, стои спор кои го знаете сите како и меѓународната јавноста. Меѓутоа јас сум оптимист и сум длабоко уверен, дека доколку сите ние максимално зрело и посветено настапиме, ќе се искачиме погоре на скалилото на политичката зрелост. Актуелната Влада и мнозинството активно работат за затворање на овие прашања за да се осврниме на реформите, за да се вратиме на брзата пруга за враќање на патот кон ЕУ и НАТО, рече Џафери.
Тој го посочи новопотпишаниот договор за добрососедство со Бугарија потпишан од премиерите Зоран Заев и Бојко Борисов како пример за патот на Македонија кон подобрување на односите и придвижување кон ЕУ.
– Периодот кој следи налага многу работа и сериозни и тешки одлуки и решенија, кои во разумен рок ќе ја покажат придобивката. Собранието и администрацијата имаат капацитет да го остварат владиниот план 3-6-9. Сакам да верувам дека последната политичка криза не научи дека не смееме да ги повториме сопствените грешки. Верувам дека сите ние полека, но сигурно ги надминуваме некои антагонизми за кои нема простор денес во Македонија, забележа собранискиот спикер.