Радио концертот на Бојан Петков на Канал 103. Бојан, на јавноста познат како гитарист на Летечки Пекинезери, на 07.07 (недела) во 22 часот, во емисијата “Ако никој не свири”, тој во живо ќе ја претстави музиката на која работи веќе неколку години и дело што претставува интимен творечки израз кој авторот реши да го сподели со светот.
По успешното прво претставување на оригиналните дела на Бојан во пролетта 2011-та на истата фреквенција, на ред дојдоа новите и нечуени песни за кои веруваме дека ќе го украсат амбиентот на неделната вечер и ќе ви ја исполнат топлата летна ноќ. Питоми, искрени, меланхолични и емотивно прецизни, песните на Бојан ќе понудат една сосема поинаква звучна перспектива.
“Луперот” (педала која овозможува музичарот да се придружи сам себе) на Бојан е единствен сојузник на неговата гитара, што подразбира дека тој самиот ќе ја ѕида и надоградува својата идеја, чија крајна цел е унифициран и конечен звук кој предизвикува дури и во соло форма.
Жанровската категорија во која припаѓаат песните на Бојан не е нешто што треба да се дефинира, туку да се прилагоди на личното расположение и да флертува со емоцијатаа. Стиловите се отворени а слушателот е поканет да ја прифати музиката како и да милува, што е повеќе од доволна причина да ве поканиме да се вклучите на Стотројка во недела во 22.