Баерн Минхен со стил влезе во новата сезоната во Бундеслигата и уште во воведниот меч покажа зошто важи за прв фаворит за титулата. Сметка за бледите партии на Баварците во подготвителниот период плати Баер Леверкузен кој го положи оружјето на „Алијанц арена“. Тимот на Карло Анчелоти славеше со 3:1 во меч што го одбележаа дебитантите.
Себастијан Руди и Никлас Суле кои беа тандем на Хофенхајм во ланската сезона, овојпат проработеа во дресот на Баерн М. уште во деветтата минута. Руди нафрли, а Суле со глава го совлада Бернд Лено за водство на домашните. Девет минути подоцна нова причина за еуфорија на трибините. Најскапо платениот француски фудбалер во историјата на германското првенство, Корентин Толисо зголеми на 2:0 по мешаницата во гостинскиот казнен простор.
https://www.youtube.com/watch?v=7OuK8jr-UTU
Второто полувреме во Минхен почна со 15 минутно задоцнување поради силен дожд што, сепак, не ги олади Баварците. Кусо по враќањето на терен постигнаа и трет гол на што претходеше консултација на главниот судија со ВАР технологијата. Влечењето на Арангуиз на Левандовски остана незабележано од Тобијас Штилер кој по прегледување на видео снимка од моментот, сепак, покажа на белата точка. Полјакот го изнуди, Полјакот и ја презеде одговорноста за изведување на најстрогата казна. И не погреши за убедливи 3:0.
Се што „фармацевтите“ успеаја да сторат до крајот на мечот беше евроголот на Адмир Мехмеди во 65 минута.
Мечот на „Алијанц арена“ во Минхен започна со едноминутен молк во чест на жртвите во терористичкиот напад во Барселона.
Бундеслига, 1 коло
Баерн Минхен – Баер Леверкузен 3:1
Утре играат
Хофенхајм – Вердер (15,30 ч.)
Херта – Штутгарт
Хамбургер – Аугсбург
Мајнц – Хановер
Волфсбург – Борусија Дортмунд
Шалке – Лајпциг (18,30 ч.)
Недела
Фрајбург – Ајнтрахт Франкфурт (15,30 ч.)
Борусија Менхенгладбах – Келн (18 ч.)