Македонците најмногу поткупувале полицајци (19 проценти), на второ место е митото во судството (16 проценти) и здравството со 13 проценти. Вкупно 17 проценти од испитаниците од Македонија во глобалното истражување на Транспаренси Интернешнал признале дека дале мито за да добијат одредена услуга. Иако оваа бројка од 17 проценти претставува намалување во однос на истражувањето од 2010 година кога процентот изнесувал 21, сепак, од Транспарентност Интернешнл Македонија велат дека податоците се се уште загрижувачки и обележуваат критична фаза во степенот на корупција.
Најголем дел од испитаниците или 42 проценти одговориле дека поткупот го дале затоа што тоа било единствен начин да добијат одрена услуга или да ги забрзаат процедурите.
Македонците, исто така, во голема мера сметаат дека нивото на корупција не е намалено или останало исто или 70 проценти од испитаниците одговориле дека корупцијата варира од многу или малку зголемена до иста, додека 26 проценти сметаат дека малку е намалена, а само 4 проценти дека е многу намалена во последните две години.
„Намалени“ се и оценките за ефективноста на Владата во борбата против корупцијата во однос на 2010 година. Ако во 2010 повеќе од половина од испитаниците одговориле дека Владата е многу или до одреден степен ефективна во намалувањето на корупција, годинава процентот паднал, па сега само 10 проценти сметаат дека Владата е многу ефективна, а 29 проценти дека е до одреден степен ефективна во борбата против корупција.
Индексот за корупција во земјава за политичките партии, парламентот, приватниот сектор, образованието, судството, медиумите и невладините организации е 4,1 на скалата од 1 до 5, со тоа што единицата означува „не се корумпирани“, а петката дека се „екстремно корумпирани“.
Овие резултати се дел од светското најголемо истражување за јавното мислење за корупцијата на Транспаренси Интернешнал наречено Барометар на глобална корупција 2013.
Во видеото погледнете дел од презентацијата на Слаѓана Тасева, претседател на Транспарентност Интернешнл – Македонија.