По посетата во Белград, високата претставничка на ЕУ за надворешна политика и безбедност Кетрин Ештон ја посети и Приштина.
Оттаму изјави во средата дека очекува спроведување на сè она што Србија и Косово го договориле во Брисел.
„Мислам дека во Брисел и двајцата премиери (Тачи и Дачиќ) јасно ставија до знаење дека се посветени на тоа работата на нормализација на односите да продолжи и во текот на летото“, рече Ештон по средбата со косовскиот премиер, најавувајќи уште една средба на двајцата премиери кон крајот на месецот.
Ештон денеска во Белград, утре во Приштина
Ештон додаде дека ЕУ, постигнувањето договор со Србија на 19 април и посветената и напорна работа што беше вложена, ја награди со започнување преговори за Договорот за стабилизација и асоцијација.
Претставничката на ЕУ за надворешна политика и безбедност го повика косовскиот парламент да го усвои контроверзниот закон за амнестија што минатата недела не беше усвоен, поради забелешките на јавноста и опозицијата на клаузулата која можеше да се искористи за аболиција на насилни криминалци.