Министерот за здравство Арбен Таравари ќе ја жртвува министерската позиција за партијата. Тој за НОВА потврди дека Алијансата на Албанците морала да понуди кандидат за градоначалник бидејќи не успеале да се договорат со помалите партии, а како најсоодветен за градоначалник на Гостивар, партијата проценила дека е токму Таравари. Заради тоа Таравари ќе се повлече од функцијата министер за здравство, но Алијансата ќе бара да го задржи ресорот здравство и ќе инсистира на првата седница по локалните избори да се назначи нов министер од истата партија. Доколку не го добие градоначалничкото место во Гостивар, Таравари најавува дека ќе се збогува со политиката.
“Нема друг член од нашата партија кој би го кандидирале за градоначалник. Се надевавме дека ќе имаме договор со некоја од помалите партии, но не успеваме да се договориме. Доколку не го добиеме градоначалничкото место, ќе се збогувам со политиката и ќе останам да работам како лекар, аќе имам повеќе време за семејството“ изјави за НОВА, Таравари.
Тој објасни дека до локаните избори ќе ја извршува функцијата министер за здравство, ќе доаѓа секое утро во Министерството, а работните обврски ќе ги подели со заменик министерот и со државниот секретар.
„ Ќе ги извршувам работните обврски заедно со мојот заменик и државниот секретара за граѓаните да не почувствуваат ништо. За време на кампањата и кога ќе завршат локалните избори ќе бидам заменет со друг. Ние ќе бараме новиот министер да биде од Алијансата, се разбира доколку успееме да се договориме“ рече Таравари
Тој најави дека со доаѓањето на новиот министер составот на кабинетот ќе остане ист, а нема да има нови смени на директорските места и нови турбуленции во здравството.