Еврокомесарот за проширување Штефан Филе во среда пристигнува во Белград, а веќе следниот ден ќе има состанок со техничките тимови од секое поглавје. Тоа значи дека во наредните денови ќе мора да бидат подготвени сите тимови, технички и главни, како и главниот преговарач, јавуваат српските медиуми.
Србија веќе има формирано работни групи за 35 поглавја и истите групи ќе бидат трансформирани во преговарачки тимови. Во моментов во работните групи учествуваат околу 500 луѓе, но не се знае колку дополнително ќе мора да се вклучат со оглед на обемноста и сложеноста на преговарачкиот процес.
Владата на Србија најавува дека засега нема да има дополнителни вработувања за потребите на преговорите со оглед на потребите за штедење, па затоа ќе гледале да се „снајдат“ со оние луѓе кои веќе им се на располагање.
Сепак, нагласуваат дека бројот на ангажирани службеници во иднина ќе се менува бројот во зависност од тоа за кое поглавје во моментот се преговара. Засега се претпоставува дека најмногу работа ќе има во поглавјата 23 и 24 (човекови права и борба против корупција).