Спротиставени мислења доаѓаат од редовите на ВМРО ДПМНЕ и СДСМ во однос на иднината на работата на Комисијата за расветлување на настание во Парламентот од 24 Декември. За СДСМ, Комисијата не може да продолжи да работи да работи без претседател, додека за ВМРО ДПМНЕ оваа опција е можна и отворена.
— Нема основа да работиме без претседател, таа е правно заснована како целина еден акт и брои пет члена, рече професорот Љубомир Фрчковски, член на Комисијата делегиран од страна на СДСМ
Другиот член на комисијата од ВМРО ДПМНЕ, Илија Димовски вели дека нема пречки работата да продолжи и без претседател имајќи во предвид дека и, сега веќе претседателот во оставка, Борче Давитковски се сложил да стави потпис на изештајот ако двете страни во меѓувреме се договорат.
– Вчера вечерта беше остварен и телефонски повик помеѓу претседателот на ВМРО ДПМНЕ Никола Груевски и претседателот на СДСМ Зоран Заев и беше договорено јас и Фрчковски да контактираме во име на двете страни и во наредните денови да договориме како ќе продолжиме. Комисијата може да продолжи со работа ако има политичка волја од двете страни, рече Димовски.
Но, несогласувањата не запираат само околу можноста работата да продолжи. Како што рече и Давитковски, тој комисијата ја напуштил поради несогласувањата помеѓу членовите околу заклучоците и препораките.
За СДСМ е неприфатливо да не расправа за уставноста на чинот на исфрлањето на пратениците и новинарите од Парламентот.
-Не станува збор за наши мислења против нивни мислења, туку се работи за отсуство на политичка волја Комисијата да влезе во остварување на дел од нејзиниот мандат, врз основа на мартовскиот договор. Тоа е делот каде што се обврзува комисијата да расправа за уставноста на настаните. Всушност, одбивањето за расправање по однос на уставноста е клучниот, главниот проблем кој ја блокира Комисијата, вели Фрчковски.
За ВМРО ДПМНЕ пак, извештајот е многу добар и содржи одлични препораки и заклучоци.
– Тие велат дека била нарушена уставноста, ние на блокирањето гледаме како на своевиден државен удар за превземање на парламентот, рече Димовски.
Давитковски засега останува на својата одлука за оставка иако најавува дека во случај на компромис помеѓу двете партии тој ќе го потпише извештајот.
-Ако се согласат за правните квалификации, за препораките, ако најдат заедничко решение, јас веднаш со две раце би потпишал. Тоа беше и мојата идеја, да најдам некој разумен компромис или евентуално балансирани квалификации, балансирани препораки во интерес на државата, изјави Давитковски
Како и дали комисијата, која произлезе како резултат на мартовски договор реализиран под притисок и покровотелство на Европската Унија, ќе се справи со предизвиците останува да се види во наредните денови, за кога и ДПНЕ најави дека ќе чека одговор до СДСМ за нивниот предлог да проложат со работа без претседател. Единствената работа околу која се согласија и двете партии е дека „извештајот бил хронолошки, добро изработен и имал добри препораки и заклучоци“.