21 работник од штипската фабрика „Актива“ завршија во болница поради симптоми на труење со храна, а Државниот здравствен и санитарен инспекторат ја затвори фабричката менза. Првите знаци работниците ги почувствувале веднаш по ручекот и побарале медицинска помош. Од Клиничката болница велат дека работниците откако ја добиле соодветната терапија се пуштени на домашно лекување.
„Во текот на вчерашниот ден, од некаде од 13 часот до вечерта до 20 часот на инфективното одделение во штипската клиничка болница се имаат јавено 21 лице со симптоми на повраќање и дијареа. Укажана им е лекарска помош и сите се пуштени на домашно лекување“, изјави Ален Георгиев, директор на Клиничка болница-Штип
Од раководството на фабриката велат дека сеуште се вршат испитувања и ги чекаат резултатите од санитарната инспекција. Се претпоставува дека труењето е од храна, за затоа и инспекторите вршат анализа на мострите земени од местото каде се приготвува храната од фирма специјализирана за тоа.
Сопственикот на компанијата „Актива“, Илија Николов, изјави дека ова им е прв случај на труење со храна, а уште вчера пријавиле во санитарната инспекција.
„Се вршат испитувања. Има претпоставки дека е од храната. Ги чекаме резултатите од Санитарната инспекција. Таа е на терен, од утринава вршат испитувања на местото каде се подготвува храната, што ние ја добиваме од фирма специјализирана за тоа. Ние како компанија веднаш реагиравме. По првите симптоми сите работници од наша страна се однесени во болница, а дел веќе се вратија и на работа“ , вели Илија Николов – сопственик на Актива.
Фабриката „Актива“ има 400 вработени и произведува делови за автобуси на белгиски „Ванхол“ и има погон за монтажни објекти.