Јавното обвинителство ги пронајде сите тројца напаѓачи во Собранието, за чие идентификување побара помош од јавноста.
Јавното обвинителство на Република Македонија изразува благодарност до сите совесни граѓани со чија помош е утврден идентитетот на лицата чии фотографии беа објавени. По наредба на Јавното обвинителство, трите лица се лишени од слобода.
-Станува збор за лица кои се инволвирани во кривично правниот настан во Собранието на Република Македонија. Фотографиите и повикот до граѓаните за нивно препознавање беа објавени согласно член 277 од Законот за кривична постапка, по предходно дадено одобрение од Основното јавно обвинителство Скопје и во соработка со Министерството за внатрешни работи – пишува во соопштението од ОЈО.
По пријава на граѓанин полицијата го пронашла и привела еден од тројцата осомничени за насилните протести во Собрание на 27. април. Приведен е Оливер Ошавковски, лицето кое на фотографијата што ја објави МВР е со качкет на главата. Информацијата за НОВА ТВ ја потврдија соседи на Ошавковски во Хром, кои велат дека пред триесетина минути во неговиот дом пристигнале полициски Алфи и го однеле во полициска станица.
Неофицијално, покрај Ошавковски, другите двајца се Сашо Сенков и Николче Димитровски.
