Дванаесеттото издание на „Pop UP АКТО АКЦИЈА!“ фестивалот за современи уметности ќе се одржи на 27 и 28 октомври во Скопје, на локациите Кино Култура и Железничка зграда.
Под мотото „Граѓаните за културните простори, граѓаните за културата“ ова издание на фестивалот преку својата програма ќе го адресира прашањето за заживувањето на неколку културни простори во Скопје и Битола, и нивно враќање во функција на културниот живот на граѓаните. Во Битола фестивалот АКТО неодамна го реактуелизираше проблемот со ревитализација на Офицерскиот дом, а во Скопје акцентот ќе биде на кино Култура и Железничката зграда – културно наследство од 1946 год. со уникатни решенија за колективно домување која долги години стои неискористена.
Централен настан на фестивалот ќе биде АКТО АГОРА – јавна расправа која ќе ја преиспита улогата на граѓаните за културните простори во градот. Диксусијата ќе се одржи овој петок во Кино Култура, со почеток од 12 часот на пладне.
Идејата на агората е да ја потенцира потребата за реновирање на три простори: Офицерски дом во Битола, Железничка зграда и Кино Култура во Скопје кои треба да прераснат во места на повеќе значења важни за днешното фунцкионирање на различни заедници. Учесници на агората ќе бидат активисти, експерти за културно наследство,членови на независната културна сцена, заинтересирани граѓани, како и парламентарци и членови на комисии за култура и луѓе од раководни позиции од јавните институции.
ПОП АП АКТО АКЦИЈА е поддржан од Министерство за Култура на РМ, Фондација Фридрих Еберт – канцеларија Скопје, и Општина Центар.