Смртта на родилката Маја Кадиева од Гевгелија настапила од задушување поради погрешна интубација и обид за реанимација. Обдукцијата покажала видливи повреди на грлото и хранопровод, а во крвта биле најдени големи количини на јаглерод диоксид. Овие факти на денешното рочиште ги изнел судскиот вештак од Институтот за судска медицина.
Според извештајот новороденчето од утробата на мајката било извадено предоцна, живеело 10 минути и кај него во организмот бил пронајден наталожен јаглерод диоксид и средство за анестезија. И бебето починало како последица на погрешното интубирање и обид за реанимација на родилката. Тоа било здраво и напредно бебе кое требало да се роди на време, во одредениот термин.
Во судскиот процес досега се сослушани сите сведоци, завршена е доказната постапка. На денешното рочиште беше презентиран извештајот на судскиот вештак.
„Се гледа крајот на судењето, а адвокатите на обвинетите ја одвлекуваат целата судска постапка. Задоволен сум како судијката професионално го води судскиот процес“, изјави за НОВА, Мите Кадиев сопруг на починатата 33 годишна родилка.
Родилката Маја Кадиева и нејзиното бебе починаа во октомври 2015 година во гевгелиската болница при породување со царски рез. За смртта е покренато обвинение против двајцата анестезиолози(едниот почина)и двајца гинеколози. Анализите на крвта кои ги направи МВР покажаа дека анастезиолозите породувањето го вршеле во пијана состојба.