Лидерот на Каталонија, Карлес Пучдемон нагласи денеска дека одлучил да не свика парламентарни избори кои би можеле да ги отстранат тензиите со шпанската влада.
Тој истакна дека таквата одлука ја препушта на Парламентот, односно на парламентарното мнозинство.
Каталонскиот премиер денеска рече дека размислувал да побара предвремени избори, но не ја донел таквата одлука затоа што не добил доволно гаранции дека владините „навредливи” потези за преземање контролата врз Каталонија ќе бидат суспендирани.
Пучдемон потенцираше дека тој не добил никакви гаранции дека членот 155 од Уставот нема да биде активиран или дека „репресијата“ би завршила доколку бидат распишани избори.
Претседателот на каталонската Влада изрази жалење поради „навредливиот и неправеден“ обид на Шпанија да го „искорени“ самоуправувањето на областа, дополнувајќи дека тоа нема да биде прифатено.
– Жалиме затоа што одговорност е побарана само од едната страна, додека на другата и е дозволено да се однесува целосно неодговорно, истакна тој.
Во кусиот говор во Барселона, сепаратистичкиот лидер рече дека регионалниот парламент сега ќе одлучи како да одговори на планот на шпанските власти за преземање на ингеренциите од регионалната Влада во Барселона.
Мерките без преседан треба да бидат одобрени утре во Мадрид и ќе доведат до прва директна интервенција од страна на централните власти во работите на еден од 17-те автономни региони во земјата. Конзервативната влада на Шпанија понуди да ги запре вонредните мерки ако се одржат нови избори во Каталонија, но неодамна се повлече од тоа.
Претходно, Пучдемон најави дека ќе има телевизиско обраќање поради широко распространетите спекулации дека тој ќе распише избори и на тој начин ќе сигнализира голема отстапка во спорот околу притисокот на Каталонија за отцепување. Тоа обраќање подоцна беше откажана. Неколку часа подоцна, Пучдемон се појави пред новинарите да се соберат во владината палата на Каталонија и, во краток говор, ја отфрли можноста за нови избори.




