Турскиот премиер Реџеп Тајип Ердоган изјави дека треба да бидат преземени законски мерки против британскиот весник “Тајмс“, како и против оние кои го напишаа отвореното писмо во кое се критикува полициското насилство врз демонстрантите во истанбулскиот парк Гези.
– Тоа се луѓе кои ги дале своите умови под наем. Ако беа искрени по прашањето за демократија, тие немаше да дејствуваат толку неморално и да го нарекуваат „диктатор“ еден премиер, кој е избран со 50 проценти од гласовите на народот, изјави Ердоган денеска во Истанбул.
Тој нагласи дека потписниците на писмото не ја знаат вистината ниту за него, ниту за Турција.
– Постојат такви медиумски групи во Турција кои објавуваат секакви клевети. Како можат да не клеветат кога се в затвор? Тие што го потпишале писмото го прават ова бидејќи не ја познаваат Турција. „Тајмс“ ги дава страниците под наем и тоа е нивниот недостиг на морал, истакна турскиот премиер.
Меѓу потписниците на писмото, кое беше објавено на 24 јули, се наоѓаат актерите Шон Пен, Сузан Сарандон, Бен Кингсли и Ванеса Редгрејв, режисерите Дејвид Линч и Фуад Кавур, ирската писателка Една О’Брајан, британскиот пратеник лабурист Џереми Корбин и американскиот писател и новинар Клер Берлински.
Тие во писмото ја окваклификуваа турската Влада како „диктаторски режим“ и го критикуваат односот на Ердоган кон барањата на демонстрантите.
– Наредбите на премиерот доведоа до смртта на петмина невини млади луѓе, се наведува во писмото и се додава дека тој може да биде повикан да даде објаснувања за полициското насилство пред Европскиот суд за човекови права.
Контрамитинзите, организирани од владејачката Партија на правдата и развојот, во писмото се споредуваат со Нирнбершките собири, организирани од нацистите во Германија во периодот од 1923 до 1938 година.
Во писмото се нагласува и дека во Турција се осудени и затворени повеќе новинари, отколку во Иран и Кина заедно.