Безбедносни аналитичари го предупредиле премиерот Зоран Заев на ризик од атентат. Оваа изјава ја даде Заев во интервју во црногорската емисија „Жива вистина“. Тој нагласи дека со седнувањето на премиерското столче ја прифатил одговорноста да носи државни одлуки за добро на граѓаните.
– Сега некои аналитичари околу мене велат дека сега си ти на ред. Ако треба нешто да се случи нека се случи, јас сум прифатил да бидам премиер на мојата земја и на мојата држава и треба лидер, подготвен сум да носам одлуки какви што очекуваат моите граѓани, по цена, што биде нека биде – изјави Заев.
Освен тоа, Заев во интервјуто зборува и за односите со соседите, резултатите од локалните избори и членство на државата во НАТО и Европската Унија.
Заев искрено се надева дека Македонија ќе стане 30-та членка на Алијансата, но и очекува остри реакции од Русија. Во врска со преговорите со Грција за компромис околу името на државата, тој признава дека нема да бидат лесни.
– Мислам дека нема да биде воопшто лесно. Тоа е нешто што за нас е толку чувствително, тоа боли. Јас сум Македонец, или не сум Македонец. Што сум јас ако не сум Македонец? – рече Заев.
Автоматската покана за членство во Алијансата, штом се најде решение за спорот за името, според Заев е светла точка и мотив повеќе за наоѓање заеднички јазик со Грција. Тој го повтори ставот на владиниот кабинет дека за стабилна, просперитетна и економски развиена Македонија нема алтернатива, освен ЕУ и НАТО.