И по две години од терористичките напади во Париз, единствениот преживеан осомничен, Салах Абдеслам се уште одбива да зборува пред истражителите за неговата улога во бомбардирањата и пукотниците во кои загинаа 130 луѓе.
Според полицијата, Абдеслам бил дел од организацијата на терористите но се уште не се знае неговата улога во нападите.
Салах Абдеслам беше уапсен во Белгија минатата година во март, по четири месеци потрага по нападите на 13.ноември.
Предвидено е денеска претседателот на Франција, Емануел Макрон да ги посети местата каде што беа извршени нападите, почнувајќи од стадионот „Стад де Франс“ до музичкиот објект Батаклан.
Според полициското досие, Абдеслам бил ситен криминалец кој подоцна станал џихадист. Тој својот елек со експлозиви го фрлил во канта за отпадоци, по што веднаш започнал со своето бегање од Париз.
Полицијата утврдила дека тој дефинитивно бил дел од организацијата, изнајмувал автомобили и станови за џихадистите, и на неколкумина од нив им помогнал да стигнат во Европа.
Абдеслам се сомничи дека учествувал и во бомбардирањата во Брисел минатата година, кои се случија четири дена пред да биде уапсен.
Тој во моментов се наоѓа во самица во најголемиот затвор во Европа во јужна Франција и е под 24 часа надзор.
На 13.ноември 2015 година, три групи од терористи извршија напади на шест локации во Париз. До крајот на случувањата, 130 луѓе загинаа а стотици други повредени.
Пред „Стад де Франс“, тројца терористи извршија самоубиство, тројца други терористи нападнаа барови и ресторани, а други двајца терористи се самоубија во концертната сала Батаклан, каде 90 луѓе загинаа. Третиот од нив беше убиен од страна на полицијата.
Абделхамид Абод, човекот кој што ги испланирал координираните напади почина по рација на полицијата во стан во Париз во предградието Сент Денис пет дена подоцна.