Република Македонија од денеска, се до крајот на наредната година ќе ја предводи Регионалната група за заштита на животната средина на Западен Балкан која работи под капата на Регионалниот совет за соработка (RCC), а со која досега претседаваше Србија.
Примопредавањето се случи денеска во Бон каде што се одржа панел на високо ниво на претставници на земјите од Западен Балкан, задолжени за заштита на околината и климатските промени, организиран од RCC и ресорното министерство од Србија.
На панелот е потврдена Декларација за човековата средина и за климатските акции на Западен Балкан, а учесниците се согласија дека во регионот е се поголема потребата да се унапреди координацијата на постоечките регионални иницијативи и проекти, а меѓуресорската соработка да се зацврсти на највисоко политичко ниво кога станува збор за енергетиката и политиката на заштита на животната средина и климатските промени.
Генералниот секретар на RCC Горан Свилановиќ ги потсети учесниците дека „73% од граѓаните на регионот ги гледаат климатските промени како проблем, а 77 % од стопанствениците во ЈиЕ веќе презеле мерки за да се намалат штетните последици на околината“ од страна на нивниот бизнис. Податоците се од Годишното истражување „Балкански барометар 2017“.
На состанокот, како што соопшти RCC, се разговарало и за спроведување на Парискиот договор за климатските промени кој неодамна беше ратификуван од страна на РМ, за придонесот на земјите од Западен Балкан во агендата за заштита на околината, како и за прелиминарните резултатите од „Студијата за климатските промени во регионот на Западен Балкан и нивното влијание врз различни стопански сектори“
Овие резултати покажуваат дека регионот на Балканот во бројни сектори е многу поподложен на климатските промени отколку остатокот од Европа.
Македонија на овој состанок ја претставуваше заменикот министер за заштита на животната средина Јани Макрадули.