Стапката на невработеност во Грција пораснала во мај 2013 година на 27,6 отсто, ново највисоко ниво во поблиската историја на земјата, надминувајќи го досегашниот рекорд од 27 проценти од април годинава, покажаа официјалните резултати.
Податокот за стапката на невработеноста е најголема откако грчката државна статистичка агенција ELSTAT во 2006 година започна да ги објавува ваквите извештаи, и повеќе од двојно е поголем отколку просечната стапка на невработеност во еврозоната којашто изнесува 12,1 отсто.
Рекордната невработеност во Грција е последица на шестгодишната рецесија, како и на радикалните мерки за штедење коишто ги воведе владата во Атина, за да го намали огромниот државен долг и условеноста од меѓународните грчки кредитори, пренесува макфакс.
Грција, имено, од 2010 година преживува благодарејќи само на финансиската помош од Меѓународниот монетарен фонд и партнерските земји од еврозоната. За да продолжи да ја добива меѓународната помош од стотици милијарди евра, странските заемодавачи бараат земјата да ги спроведува непопуларните реформи, кои меѓу другото вклучуваат и зголемени даноци и намалување на вработените во јавниот сектор.