Предлог-законот за амнестија и предложените измени на Законот за административни службеници, двата во прво читање, попладнево добија поддршка од Собранието во рамки на 27 седница.
Заменик-министерот за правда Оливер Ристовски образложи дека со Предлог-законот за амнестија треба да бидат ослободени од издржување казна затвор приближно 670 правосилно осудени лица на затвор до шест месеци, а за 3 097 лица да биде намалена казната за 30 проценти.
Министерството за правда при подготвувањето на законот ги имало во предвид условите во казнено-поправните установи како институции кои треба да овозможат и обезбедат успешна ресоцијализација на осуденичката популација и кои, посочи Ристовски, неспорно се пренатрупани, условите за престој од меѓународните организации се оценети како нехумани, а опасноста од криминална инфекција во казнено-поправните установи е реална. Затоа се оценило дека е неопходно донесување закон со кој група лица осудени на казна затвор до шест месеци за лесни кривични дела ќе се ослободат од издржување на казната. За другата затворска популација е предвидено намалување на вкупната казна за 30 проценти освен за делата што со овој предлог се изземени од амнестија.
Пратеничката од ДУИ Мирсада Емине-Асани рече дека го поддржуваат законот, потенцирајќи дека со него, меѓу останатото ќе се оствари и заштеда на буџетски средства кои би се искористиле за подобрување на условите во казнено-поправните домови.
Како што наведе Ристовски, со предложениот текст на законот не се предвидува амнестија за лица правосилно осудени на казна доживотен затвор, како и за сторители на кривично дело убиство од член 123 од Кривичниот законик.
Со предложените измени на законот за административни службеници, пак, се овозможува проверката на знаењето за познавање странски јазик при вработување во администрацијата да биде на товар на државата и да се укинат казните од оценувањето во јавната администрација, којшто, според ресорниот министер Дамјан Манчевски, бил еден од механизмите што многу често се користел за политички притисоци.
– Со ова праќаме порака дека притисоците во администрацијта се завршени и оти апсолутно немаме намера да се занимаваме со политички реваншизам, рече Манчевски.
Дополни дека со законските измени ќе се овозможи и унапредување на раководниот кадар во администрацијата. Констатирано е дека има превработеност во најниските нивоа на администрацијата, но огромен недостаток на раководен кадар.
– Сега се овозможува во рамки на една категорија работни места одреден кандидат да биде унапреден, максиумум за три места, но, ова не важи за уназадување. И не мислиме ова да го користиме како средство за политички притисок врз администрацијата, потенцираше Манчевски.