За да се спречи можниот влез на фалсификувани лекови, за сигурни безбедни лекови добавувачите на лекови ќе мора да обезбедат сертификат за квалитет директно од производителот, сетрификат од акредитирана и референтна лабораторија и сда достават доказ за следливост од местото на производство до крајната испорака. Ова го содржат измените на Законот за лекови кои поминаа на Влада и се наоѓаат во Собраниска процедура. На овој начин начин ќе се зајакне нивото на сигурност на лековите што се носат со паралелниот увоз, изјави Роберт Бекироски, директор на Агенцијата за лекови.
„Во изминатите месеци го зајакнавме и инспекцискиот надзор така што и сите инсулини што беа донесени со паралелен увоз на лекови детално и поединечно беа инспектирани и во соработка со референтни лаборатории овозможени се услови за нивна комплетна анализа. Моментално и во иднина врз инсулините ќе се вршат целосни анализи согласно пропишаните барања за квалитет“, изјави Бекироски.
Тој потенцира дека во изминатите месеци, инспекторите откриле поединечни пакувања од фалсификуван лек за што во Основното јавно обвинителство веќе се води истрага.
Беќировски објасни дека за тие лекови од соодветна лабораторија се докажало дека станува збор за фалсификувани лекови и тие не биле пуштени во употреба.
Паралелниот увоз на лекови е воведен во 2012 година, а со измените од 2013 година стана генератор на несигурност и недоверба кон здравствениот систем од страна на пациентите и здравствените работници.
„Имајќи го предвид тоа и објективните слабости на тоа законско решение во соработка со експертската јавност се зафативме со изготвување на измени во регулативата со која се регулира начинот на реализирање на паралелниот увоз на лекови. Измените се во собраниска процедура и очекувам во многу кратко време да бидат имплементирани во нашето законодавство“, рече Бекироски.
Друг сегмент на кој посветиле внимание е функционирање на системот за следење на несакани ефекти од употребата на лековите и медицинските средства, кој не функционирал како што треба. Доказ за тоа, потенцира, се само 48 пријави евидентирани од јануари до октомври 2017 година.
Беќировски рече дека за надминување на оваа ситуација е оформена работна група која ја сочинуваат клинички и болнички фармацевти од различни здравствени институции, кои поминале обука и продолжиле да ги применуваат добиените сознанија, а како почетен резултат од таа активност за период од два месеци бројот на пријави е зголемен на над 100 и се очекуваат уште позначајни резултати.
Беќировски порача дека гарантира дека инсулините кои биле пушени во промет во изминатиот период се со проверен квалитет и увери дека во иднина ќе обезбедат уште поквалитетни инсулини.