Европската комисија смета дека е можно до 2025 година Србија и Црна Гора да станат полноправни членки на Европската унија, а во тој период четири други држави ќе бидат длабоко во пристапниот процес.
Тоа се наведува во стратегијата за земјите од регионот што ја подготвува Европската комисија под наслов „Кредибилна европска перспектива за Западен Балкан“.
Според најавите, овој документ Европската комисија ќе го претстави најверојатно на 6 февруари во Стразбур.
Србија и Црна Гора можат да станат полноправни членки на ЕУ до крајот на 2025 година, доколку до 2019 година ги исполнат критериумите од владеење на правото, што подразбира нивните лидери „сериозно и со јасна посветеност“ да се соочат со реформските предизвици.
Во случајот со Србија, за да се реализира оваа временска рамка (2025), земјата мора да ги исполни и критериумите кои произлегуваат од поглавјето 35, кое се однесува на нормализација на односите со Косово.
Во предлог-документот, ЕК претставува најоптимистично сценарио во временска смисла за секоја земја од регионот.
Според индикативната временска рамка на Европската комисија, произлегува дека 2019 година ќе биде клучна за државите од Западен Балкан.
Во документот се наведува дека во текот на 2019 година Косово и Србија треба да постигнат „севкупна нормализација на односите“, што „ќе овозможи натамошен суштински напредок на Косово на патот кон европските интеграции“.
Исто така, 2019 година ќе биде важна и за Албанија и за Македонија кои треба да ги отворат пристапните преговори со Брисел, а Босна и Херцеговина дури тогаш да добие кандидатски статус.
Отворањето на можни пристапни преговори со Сараево се предвидува дури во 2023 година. Таа година, според прогнозите на Европската комисија, ќе биде во знакот на завршување на пристапните преговори со Црна Гора и Србија, а во 2024 година се планира потпишување пристапен договор кој би стапил во сила една година подоцна, односно крајот на 2025, кога и тие две земји ќе станат нови членки на ЕУ.
Бриселските институции ги предупредуваат западно-балканските држави итно и сериозно да се позанимаваат со решавање на сите билатерални спорови кои мора да бидат решени пред пристапот на која било земја во ЕУ.