По шпекулациите на одредени функционери и новинари во изминатиов период додека траеше дебатата за медиуми, Делегацијата на Европската унија попладнево испрати соопштение во кое прецизно објаснува дека тие никогаш не барале од власта закон за медиуми како услов за членство во унијата.
-Развојот на новата легислатива за медиуми која треба да го замени актуелниот Закон за радиодифузија започна во 2011 на иницијатива на властите, а не на барање на Европската комисија. За дел од предложената легислатива која е на линија со Европските директиив за аудиовизуелни услуги , Европската комисија направи незавизна техничка експертиза достапна за Владата во 2011, 2012 и 2013, се вели во соопштението на Делегацијата на ЕУ.
Во соопштението се појаснува дека не постојат задолжителни закони за влез во Унијата кои се однесуваат на слободата на медиуми.
-Гарантирање на слободата на изразувањето и фундаментални права е задолжително за влез во ЕУ, но кога и како точно ќе се реформира медиумската легислатива на одредена земја е работа на националните органи и заинтересираните страни, велат од Делегацијата.
ЕУ порачува дека Владата не смее во брзање да донесе вака значаен закон.
-Што се однесува до самиот процес, Европската комисија беше јасна уште на самиот почеток дека Владата треба да го обезбеди потребното време за да се осигура дека предложените закони се во линија со европските стандарди и најдобрите практики и дека консултациите со релевантните заинтересирани страни се инклузивни и можни, порачува ЕУ.
Тие најавуваат дека надвор од Законот за медиуми, есенва во годишниот извештај за напредок ќе ги адресираат пошироко прашањата врзани со слободата на медиуми во земјата.