Македонскиот поет Никола Маџиров еден месец ќе престојува во Брисел како учесник на европската книжевна резиденција „Паса Порта“. Покрај едномесечниот престој во главниот град на Белгија, резиденцијата вклучува и читање.
Стипендијата најчесто им се доделува на прозни автори, а како досегашни „посетители“ покрај Дејвид Албахари, добитникот на Пулицер – авторот на филмуваниот роман „Часови“ Мајкл Канингем, ја добил и македонскиот писател Гоце Смилевски.
Следниот месец читање во европскиот книжевен центар „Паса Порта“ ќе има канадската авторка Маргарет Етвуд, неколкукратна кандидатка за Нобеловата награда за литература.
Поезијата на Никола Маџиров е веќе објавена во неколку белгиски книжевни списанија.
Оваа есен тој ќе престојува еден месец во куќата на Маргерит Јурсенар во Франција, откако беше избран од меѓународен книжевен борд во конкуренција на стотина европски автори.