Во текот на на изминатата недела (од 26 февруари до 4 март) во земјава се регистрирани 2.781 заболени од грип, што е намалување за 35 отсто споредено со неделата пред неа кога беа регистрирани 4.258 заболени лица, објави на веб страницата Институтот за јавно здравје.
Најголем број заболени – 1.651 се пријавени во најголемата возрасна група од 15-64 години, а највисока инциденца од 247,9 на 100.000 жители се регистрира кај децата на возраст од 0-4 години.
Оваа недела најголем број заболени лица – 544 се пријавени од подрачјето на Центарот за јавно здравје Скопје, а највисока инциденца 680,9 на 100.000 жители е регистрирана на подрачјето на Подрачната единица Кавадарци.
Според Институтот за јавно здравје се работи за два типа на вируси на грип – Influenza А и Influenza B вирусот во републиката, со доминација на Б вирусите.
Во последните три недели се намалува процентот на позитивно тестирани примероци од вирусолошкиот надзор (слично како и во останатите земји во Европа), што укажува дека е достигнат пикот на сезоната на грип.
Во наредниот период од Институтот истакнуваат дека се очекува постепено намалување на нивото на активност на вирусот на грип.