Британската премиерка, Тереза Меј денес изјави дека раскинува билатерални контакти со Русија и најави дека 23 руски дипломати мораат да ја напуштат земјата.
Според Лондон, Русија е виновна за труењето на екс-разузнавачот, Сергеј Скрипал на британска територија.
„Овие 23 дипломати се идентификувани како разузнавачки агенти што тајно работеле“, изјави Меј и додаде дека имаат една недела за да ја напуштат Велика Британија.
„Нема ниту едно друго објаснување освен тоа дека руската држава е виновна во обидот за убиство на г-дин Скрипал и неговата ќерка“, рече Меј пред Парламентот.
Поранешниот двоен агент Скрипал и неговата ќерка Јулија, беа најдени без свест на 4.март на клупа во Салисбери на југот на Англија.
Меј најави и раскинување на сите билатерални односи со Русија која во Велика Британија има 59 дипломати.
Помеѓу санкциите, исто така Обединетото Кралство одлучи министрите и Кралското семејство да го бојкотираат Светското првенство во фудбал кое летово се одржува во Русија.
Лондон постави ултиматум пред Москва со барање Русија да даде објаснување за труењето на Скрипал. Рокот истече во вторникот на полноќ:
„Од наша страна беше праведно што на Русија и дадовме шанса да даде објаснување но нејзината реакција покажува тотален презир кон овие тешки настани. Тие не дадода ниту едно кредибилно објаснување. Наместо тоа, употребата на невротоксичен гас ја третираат со сарказам и презир“, додаде Премиерката.
Меј оцени дека по овој “ужасен акт” односите помеѓу двете земји не можат да останат исти како порано.
Во своето обраќање на Парламентотн Меј рече дека “жали” поради патот по кој решила да оди руската дипломатија и рускиот претседател:
„Многумина помеѓу нас со надеж гледаа кон пост-советската Русија. Сакавме подобри односи и трагично е што претседателот Путин одлучи да тргне по друг пат“.
Овој развој на настаните се случува неколку дена пред изборите во Русија на кои Владимир Путин ги има сите шанси да биде повторно избран на претседател.
Руската амбасада во Лондон експресно реагираше на изјавите на Меј кои, според амбасадата, се “непријателски”, “неприфатливи” и “неоправдани”. Според Русиј “сета одговорност за влошувањето на односите помеѓу двете земји треба да ја превземат британските лидери и никој друг”, писмено соопшти амбасадата.