Македонија како така направи добар исчекор. Извештај има, и сега е време да се излезе од К15 приказната за тоа кој кому ја скрши кичмата. Сериозните полтичари и аналитичари тој муабет нека го остават на децата на игралиште и на пензионерите пред кооперациите.
Извештајот на ад хок комисијата е само една од точките на политичкиот договор од 1 март.
Со нетрпение очекувам да се спроведат и наредните чекори и имплементацијата на препораките содржани во извештајот, како и на остатокот од политичкиот договор од 1 март, порача со дипломатски јазик Штефан Филе.
Ако се протолкува оваа порака јасно е дека таа ја одразува неговата нервоза дека до 16 октомври може да не биде во можност да обезбеди поддршка од земјите членки на ЕУ за евентуалната препорака за почеток на преговори и со тоа да удри печат на и онака разнишаната кредибилност на директоратот на проширување на ЕК во очите на Советот на министрите и тоа особено по прашањето за Македонија.
Во моментов сем Филе малкумина се оние во ЕУ кои воопшто разговараат за било какви преговори со Македонија. Амбасадорот на Литванија како претседавач на ЕУ тоа доста непријатно експлицитно ни го соопшти.
Па така ако некој во Македонија е заинтересиран воопшто за ЕУ под итно треба да размисли како да му се овозможи на Филе да ја избутка петтата по ред препорака за Македонија.
Премиерот особено, нема простор за маалско перчење и заканување со предвремени избори за кои многу добро знае дека не може да ги организира пред да биде испочитуван договорот од 1 март.
„Изборна реформа, по локалните избори, вклучително и во однос на избирачкиот список (на пример пост-изборна ревизија на списокот) и други препораки од страна на ОБСЕ/ОДИХР“ стои напишано во точката 3 од договорот од 1 март и од неа нема бегање сем ако Груевски не решил да ја затвора вратата на Македонија кон ЕУ па без имплементација на овој параграф од точката 3 да оди на избори.
Во таа иста точка стои и тоа дека треба да се седне да се разговара за имплементацијата на препораките на ад хок комисијата и не помалку важно, да се продолжи прекинатиот дијалог со Здружението на новинарите. (Во мартовскиот договор е наведено ЗНМ и ниту еден друг МАН или ЖЕНА).
Сето ова како што имплиците стои во договорот треба да се случува во добар дух кој го одразува политичкиот консензус во државата за европските интеграциски процеси а не во духот на пародиите на К 15 за тоа кој кому ја скрши кичмата, дека на крајот единствена со скршена кичма ќе биде Македонија.