Краткометражниот филм „Thursday“ на македонскиот режисер Милчо Манчевски кој во 1994 година со филмот „Пред дождот“ го освои Златниот лав за најдобар филм во Венеција, по повод 70-от јубилеј на тамошниот филмски фестивал, вчера ја доживеа својата премиера.
Помеѓу 70-те режисери кои беа поканети да изработат краткометражни филмови се најде и неговиот.
Директорот на Фестивалот Алберто Барбера упати ексклузивна покана до режисерите кои влегле во историјата на Фестивалот во Венеција и во светската кинематографска историја, вклучувајќи го и Манчевски, да изработат кратки филмови на тема „Иднината на кинематографијата“.
Снимањето на филмот „Thursday“ заврши во мај во Њујорк. Сценариото е на Манчевски, продуцент е Арон Левин, а во главната улога настапува младата глумица Лора Ласи. Директор на фотографијата е Уна Ли, а композитор Игор Василев Новоградска.
„Четврток“ е ептен краток филм, како хаику, ама има ефект како кога рака облечена во чипка те удира силно во стомакот“, изјави претходно Манчевски.
Со свои филмови на специјалната селекција „Иднината на кинематографијата“ се претставуваат и овогодинешниот претседател на фестивалот Бернардо Бертолучи, како и режисерските имиња на Ким Ки-Дук, Пол Шредер, Абас Киаростами, Валтер Салјес, Монте Хелман, Катарин Бреја, Клер Дени, Атом Егојан, Џејмс Франко, Ермано Олми, Амос Гитај, Жан-Мари Штрауб, Тод Солонц, Апичатпонг Верасетакул и други.