На четири недели пред парламентарните избори во Словенија анкетите укажуваат дека изборната трка ќе биде многу тесна.
Според анкета на љубљанскиот весник „Дело“ објавена денеска, има само тројца вистински кандидати за функцијата иден премиер чии партии од почетокот на годината го менуваат водството во месечните анкети за популарност.
Според резултатите од најновата месечна анкета, спроведена кон крајот на минатата недела, за Словенечката демократска партија (СДС) на Јанез Јанша би гласале 17,2 отсто од избирачите, за Листата на Марјан Шарац (ЛМШ) – 15,3 проценти, а за Социјалдемократите (СД) на Дејан Жидан – 10,5 отсто од гласачите.
Поддршката за партијата на Јанша, според „Дело“ значително се зголемила во однос на испитувањето еден месец претходно, додека листата на градоначалникот на Камник, Марјан Шарец кој минатата година се кандидираше на претседателските избори и социјалдемократите на Жидан бележат мал пад на поддршката.
Според повеќето испитувања на јавносто мислење кои досега се спроведени, еден од овие тројца ќе добие можност да формира Влада и коалиција по изборите што ќе се одржат во недела на 3 јуни, затоа што останатите партии значително заостануваат.
Левица на Лука Месец, според анкетата на „Дело“, би добила 6,4 отсто од гласовите, на петто место е демохристијанската Нова Словенија на Матеј Тонин со шест отасто, а потоа следува Партијата на модерниот центар на актуелниот премиер Миро Церар со 4,7 проценти.
За Демократската партија на пензионери (ДЕСУС) на шефот на словенечката дипломатија Карл Ерјавец би гласале 3,6 проценти од испитаниците, а за Партијата на Аленка Братушек (САБ), која ја води некогашната премиерка, три проценти. Овие две партии се под изборниот праг од четири отсто, но со оглед на големиот број неодлучни испитаници и тие можат да сметаат на освојување на по некое место во 90-члениот Парламент




