Европскиот Параламент ги номинираше „свиркачите„ од Македонија, Златко Костовски и Ѓорѓи Лазаревски – двајцата поранешни вработени во УБК, кои открија дека повеќе од 20.000 политичари, министри, опоненети, новинари и бизнисмени се прислушуваат, за наградата за „Новинари, укажувачи и чувари на правото на информирање“ која за првпат ќе се додели во чест на убиената новинарка од Малта Дафне Каруана Галиција.
Апликацијата ја поднеле од Транспарентност Македонија. Освен македонските „свиркачи“ , во тесниот избор за добитници на оваа награда се и: словачкиот истражувачки новинар Јан Куцијак кој беше убиен, основачот на Викиликс Џулијан Асанж, Мариа Ефимова, укажувач која откри корупција поврзана со политичарите во Малта и Рафаел Халет укажувачот за даночна евазија во Луксембург, поврзан со „Луксембург Ликс“.
„Благодарение на нивниот бескомпромисен патриотизам, во јавноста одекна вистината за вклученост на Владата во различни криминални активности, вклучувајќи изборни измами, следење на политичките опоненти, мешање во работата на медиумите, во изборот на судиите и во судските одлуки“, пишува во номинацијата.
Претседателката на Транспаретност Слаѓана Тасева рече дека „Македонија е горда што ги има Костовски и Лзараевски кои по пат на укажување го открија незаконското и коруптивното однесување на претходната власт“. Но, напомена дека властите мора да преземат мерки, овие лица да ги добијат сите права што им следуваат со Законот за свиркачи, кој беше донесен, но не се спроведува, ни од претходната, ни од актуелната власт.
Сатисфакцијата е голема, но не забораваме низ што се поминавме, рече Лазаревски за номинацијата.
И покрај сите притисоци и закани со кои се соочиле и стравот кој се уште го чувствуваат, тој кажа дека немаат никаква заштита од државата. Тој се уште не е вратен на работното место во МВР и вели дека контактите кои досега ги имал со властите биле само во насока на објаснување на причините, кои за него се несфатливи.
„Првпат јавно ќе кажам дека моја желба е да се вратам во МВР, зашто припаѓам на безбедносните служби. Но мислам дека постои некој центар на моќ кој е против моето враќање таму“, рече Лазаревски.
Тој смета дека е добро што се формира нова агенција за прислушување ОТА која ќе биде одвоена од УБК и рече дека размислува дали да се кандидира за директор на оваа Агенција.
Тасева вели дека пресудата на Врховниот суд во Атина, кој одлучи главните осомничени за прислушувањето Грујески и Бошковски да не бидат екстрадирани во земјава, треба да биде аларм државава конечно да преземе мерки и да ги заштити Лазаревски и Костовски.
„Оваа одлука е доказ дека некој жестоко се бори за овие луѓе, да им обезбеди и логистика и се, а ние сме сами оставени. Ја забележувате разликата“, рече Лазаревски.
Лазаревски кажа дека никогаш не се сретнал со премиерот Заев. Снимените материјали од прислушувањето му ги предале на Зоран Верушевски, кој сега е советник за национална безбедност на премиерот Заев.