Ирските граѓани вчера, со големо мнозинство, изгласаа либерализација на најрестриктивното законодавсто за абортусот во Европа.
Во оваа мала земја од 4.7 милиони граѓани е забранет абортусот освен во случај на опасност за животот на мајката.
Според анкетите на излез од гласачките места на повеќе агенции, вчера 68 отсто гласачи гласаа за измена на Уставот наспроти 32 отсто кои сакаат статус кво. Според јавниот ТВ сервис РТЕ дури 70 отсто побарале измена на ова рестриктивно законодавство.
Во текот на кампањата стана јасно дека постои јаз помеѓу жителите на селата и градовите како и јаз помеѓу ставовите на младите и постарите лица. Така, според агенцијата ИПСОС-МРБИ, лицата постари од 65 години гласале за статус кво додека кај младите од 18 до 24 години 84 отсто се за измена на законите и либерализација на абортусот.
Во текот на кампањата владата ја поддржа измената на законите за либерализација на абортусот.
Народната консултација се однесуваше на укинување на членот 8 од Уставот, воведен во 1983 година, во кој се забранува абортусот во име на правото на живот на детето што треба да се роди. Според ова законодавство животот на нероденото дете е еднаков со тој на мајката.
Во 2013 година еден случај ја скандализираше Ирска но и цела Европа. По спонтантиот абортус на една жена лекарите одбиле да ја направат неопходната киретажа поради тоа што се уште се слушале отчукувањата на срцето на детето па жената почина од сепса.
По овој случај беше воведена реформа на законот со која се дозволи абортус кога животот на мајката е во опасност. И покрај тоа ирското законодавство е најстрогото во Европа а по нив следа Северна Ирска и Малта со што илјадници жени секоја година одат во странство да абортираат.
Референдумот се случува на три месеци од најавената посета на Папата Францис во Ирска и три години по легализацијата на хомосексуалните бракови во оваа земја. Легализацијата предизвика вистински потрес во оваа католичка земја. Освен тоа во последните години повеќе педофилски скандали помеѓу свештениците ја скандализираа јавноста. Заедно со вчерашниот референдум, ова покажува дека влијанието на Црквата се намалува.
Финалниот резултат на референдумот ќе биде објавен денес попладне. Потоа владата ќе изработи нов закон според кој ќе може да се абортира во текот на 12 недели бременост и до 24 недели доколку здравјето на мајката е во опасност.




