Вкупно 61,5 проценти од граѓаните не се согласуваат со промена на името во Република Илинденска Македонија, покажуваат резултатите на анкетата која ја спровела агенцијата М-Проспект.
На прашањето како ќе гласате на референдум доколку прашањето е „Дали се согласувате со промена на името во Република Илинденска Македонија“?, вкупно 61,5 проценти од испитаниците рекле дека би одговориле со „Не“, 27,3 отсто со „Да“ и 3,7 проценти со “Нема да гласам“.
Од М-Проспект, наведуваат дека споредено со резултатите на теренската анкета од април 2018, за граѓаните додавката „Илинденска“ е помалку прифатлива од додавката „Горна“, која би ја прифатиле 41,5 проценти од граѓаните.
Резултатите покажуваат дека со „Не” би гласале 70,5 проценти од етничките Македонци, додека за 52,8 проценти од Етничките Албанци името Република Илинденска Македонија е прифатливо решение.
Овој предлог е прифатлив за 56,4 % за симпатизерите на СДСМ, за 62,5% за симпатизерите на ДУИ, а големо мнозинство од 92,7 проценти од симпатизерите на ВМРО-ДПМНЕ рекле дека нема да го подржат.
На прашањето како ќе гласате на референдум на кој би било поставено прашањето “Дали се согласувате со промена на името во Република Илинденска Македонија кога земјата ќе стане членка на ЕУ”?, 53,4 проценти рекле дека ќе одговорат со „Не“, а 38,9 проценти со „Да“.
Од М-Проспект, наведуваат дека споредено со резултатите од теренската анкета во април 2018, многу поприфатлива опција кога земјата би влегла во ЕУ е Република Горна Македонија, за која би гласале 47,6 проценти.
За симпатизерите на СДСМ овој предлог е прифатлив за 71,8 проценти, за симпатизерите на ДУИ е прифатлив дури за 88,8 проценти. Високи 89,5 проценти од симпатизерите на ВМРО-ДПМНЕ не би го подржале овој предлог.
Анкетата е спроведена телефонски во периодот од 23 до 26 мај 2018 година на национален репрезентативен примерок од 1.047 испитаници.