Етичката комисија при Лекарската комора ја разгледала пријавата од Државниот санитарен и здравствен инспекторат за случајот со болницата Санте плус на чија Фејсбук страна беа објавени фотографии од родилка и нејзиното новороденче при породување со царски рез. Од комисијата испратиле барање со објаснување од раководството на болницата по што ќе донесат одлука со каква опомена ќе настапат.
„ Секако с е прекршени Законот за здравствена заштита и Законот за права на пациентите. Мора да има писмена согласност од пациент за такво нешто и јас не би сакала некој да ме слика за време на операција. Ние имаме обврска да се грижиме и за правата на пациентите. Како и да е по ова, Етичката комисија ќе процени каква опомена ќе биде испратена во доменот на нашите ингеренции“, изјави др. Калина Старделова Гривчева, претседател
на Лекарската комора.
Ваквата реакција на Лекарската комора доаѓа по претставката од ДСЗИ до Етичката комисија по објавувањето на скандалозните фотографии од породување со царски рез во операциона сала на која се гледаат и мајката и бебето на Фејсбук страната на болницата „Санте Плус“.
Над еден колаж од фотографии пишува „Работно попладне“, а покрај оперативниот зафат се гледаат и мајката и бебето, како и докторката како го прегледува бебето со стетоскоп.
Неговото лице на фотографиите на Фејсбук не е покриено, како и лицето на мајката, но тоа го сторивме ние согласно законската регулатива за заштита на идентитет. На една од фотографиите има и селфи на медицинскиот тим во операционата сала.