Фотографии од породување со царски рез во операциона сала на која се гледаат и мајката и бебето осамнаа на Фејсбук страната на болницата „Санте Плус“. Над еден колаж од фотографии пишува „Работно попладне“, а покрај оперативниот зафат се гледаат и мајката и бебето, како и докторката како го прегледува бебето со стетоскоп. Неговото лице на фотографиите на Фејсбук не е покриено, како и лицето на мајката, но тоа го сторивме ние согласно законската регулатива за заштита на идентитет. На една од фотографиите има и селфи на медицинскиот тим во операционата сала.
Утринава инспектори од Државниот санитарен и здравствен инспекторат направиле вонреден инспекциски во болницата Санте Плус, за фотографиите и но и за проверка на другата документација, потврдија за НОВА од ДСЗИ.
Ова предизвика бура од коментари од граѓани под фотографиите објавени на Фејбук страната на Санте Плус.
Од ДСЗИ велат дека болницата се правдале дека фотографиите се објавени со дозвола на таткото кој присуствувал на подорувањето.
„ Во болницата рекоа дека фотографиите ги објавиле со дозвола на таткото, но таква дозвола не покажаа. Објавување на вакви фотографии не е етички, особено што се гледа бебето, како и чинот на операцијата која не е за гледање. Доколку и фотографирал таткото, од болницата треба да знаат дека со камера или телефон не се влегува во операциона сала бидејќи може да биде извор на зараза при што може да го загрози здравјето и животот на новороденчето и на мајката. Вакви фотографии не треба да кружат по социјалните мрежи и затоа целиот предмет ќе го пратиме во Етичката комисија во Лекарската комора, за тие да одлучат што понатаму“, изјави за НОВА, Ирина Бухова директорка на ДСЗИ.
НОВА се обрати до управителката на Санте Плус, Весна Камиловска која рече дека не сака да даде никаква изјава.
Од ДСЗИ велат дека предметот со фотографиите се комплетира и во текот на утрешниот ден ќе биде пратен во Лекарската комора.
Неофицијално, педијатарката која го држи новороденчето во раце и го прегледува немала дозвола за работа во болницата, туку била вработена во поликлиниката во стоматолошкиот оддел, за што дополнително ќе биде поднесена пријава.
Инаку, пред неколку години докторка од Ургентен центар од Клиничкиот центар доби отказ од работа за слична фотографија објавена на Фејсбук. На фотографијата дежурниот тим се сликал со пациентка во бесознание која била донесена во текот на новогодишната ноќ.
Во јануари годинава ДСЗИ ја затвори на болницата Санте Плус поради смртта на родилката Дебора Абази од Кичево, а Министертвото за здравство еден месец подоцна им ја одзема дозволата за работа. Вишиот Управен суд им ја врати дозволата, по што тие почнаа со работа.