Новоизбраниот министер за култура Асаф Адеми побара дополнително време да го разгледа во детали најновиот Ревизорски извештај за финансиското работење во Министерството, во време на владеењето на Елизабета Канческа Милевска. Тој вчера го презеде раководењето со Министерството и кажа дека првиот работен ден се запознавал со вработените. На прашањето како ги коментира наводите во Ревизорскиот извештај, тој наместо да одговори прецизно, изјави дека ќе соработува со СЈО, институција која не е надлежна за таков тип извештаи- за Ревизорските извештаи во кои има сомневање за незаконско работење на некое Министерство, всушност надлежно е ОЈО.
„Ќе соработувам со сите институции. Специјалното јавно обвинителство е добредојдено да ги разгледа сите документи. Се сретнав со еден претставник на СЈО кој вчера беше во Министерството. Јас ќе продолжам, а тоа е политика и на Владата, секаде каде што ќе се открие криминал, ќе бидеме отворени за соработка со СЈО, како и со другите институции“ рече Адеми.
Истражителите на СЈО подолго време ја проверуваат документацијата во Министерството за култура, но како дел од предистрагата за проектот Скопје 2014.
Во Ревизорскиот извештај беше констатирано дека во Министерството се трошеле пари без покритие, се склучувале договори во четири очи, а дел од договорите биле и спротивни на Законот за трговски друштва, се делеле проекти без критериуми и се отворале објекти без технички прием.
Но покрај сите овие неправилности, ревизорот објави и дека е потрошена фантастична сума од повеќе од 9 милиони евра за печатење и преводи на книги. Освен тоа, ревизорот не се уверил дека државата воопшто имала потреба од ваков проект, кога најголем број од книгите не ни стигнале до читателите, туку завршиле во магацините на НУБ „Свети Климент Охридски“, во Археолошкиот музеј и во Музејот за македонска борба. Во магацините на овие институциите се сместени повеќе од 500 000 книги за кои се платило повеќе од 5 милиони евра.
Во времето на владеењето на ВМРО- ДПМНЕ, Груевски и Канческа беа главните промотори на овој проект кој постојано се наградуваше и прошируваше со преводи на нови книги и нови тематики. Проектот почна во 2009. и се уште трае – бидејки дел од нарачаните книги не се пристигнати и не се платени. На една од промоциите за овие книги, на почетокот на 2016 година Груевски ќе најави дека 8 години, проектот привршува.
„Некаде во 2009 и во 2010 година овој проект беше само во нашите мисли. 2011 година беше година во која почнаа подготовките, а во 2012 година веќе ја имавме и првата промоција на капиталниот проект „Ѕвезди на светската книжевност“.
Денес на почетокот на 2016 година сме речиси на крајот на неговото заокружување.Добрата книга може секој да го поведе на долги неистражени патувања, во некои други топли краишта, меѓу разни други народи, во разни други галаксии и секаде каде што човечкиот мозок преку книгата може да отпатува, кажа Груевски на почетокот на 2016, на промоцијата на нови книги.
Министерката за култура Канческа- Милевска за овој проект говореше како за „демонстрација на заложбите за создавање културен амбиент во Македонија во кој јасно се перцепираат вистинските вредности“.
Ревизорите очекуваат Министерството за култура да формира Комисија која ќе треба да одлучи што ќе се прави со книгите сместени во магацините, но и она што е значајно и да најде начин да поништи дел од договорите за печатење и издавање на нови книги.