Основниот суд Скопје 1 ги осуди на вкупно 81 и пол години казна затвор седумтемина обвинети за обидот за убиство на пратеникот Зијадин Села.
Во образложението на судот е наведено дека обвинетите се виновни дека со умисла се обиделе да го убијат пратеникот Зијадин Села откако на 27 април 2017 година влегле во Собранието на Република Македонија и се упатиле во прес центарот на Собранието каде што бил и пратеникот Села.
Никола Војминоски и Александар Јаневски – Тошта се осудени на 13, 6 и на 13 години затвор и ова се двете најголеми изречени казни во овој случај.
„Војминовски и Јаневски го извлекле пратеникот Зијадин Села од местото каде што се наоѓале и другите пратениците и им овозможиле на другите обвинети да го тепаат оштетениот. Тоа е услов без кој не можело да биде сторено кривичното дело. Дополнителна тежина на делото му дава и тоа што обвинетите Војминовски и Јаневски делото го сториле против избран функционер кој тогаш бил на своето работно место. Тие свесно влегле и недозволено и неконтролирано се движеле во Собранието“, рече во образложението судечкиот судија.
Како што нагласи судот во образложението, поради агресивно однесување а и поради тоа што Кире Ѓеоргиевски ми го задал последниот удар на Села кога тој веќе бил симнат пред Клубот на пратеници, судечкиот судија му изрече казна затвор во траење од 13 години.
На останатите четворица, Николче Димитриевски, Андреј Мицов, Оливер Ошавковски и Коста Делов судот им изрече 10 и пол години казна затвор.
„Откако Војминовски и Јаневски го извлекле и го тепале Села останатите обвинети продолжиле уште послино и потешко да го маваат по што Цео Ѓеоргиевски и Стојан Павлески кои претходно беа осудени по признанието на вината заедно со Кире Ѓеоргиевски го носеле Села низ Собранието. Кога го симнале долу им се придружил и Ошавковски кој го снимал носењето на пратеникот и ги охрабрувал другите луѓе да продолжат да го тепаат истиот“, образложи судечкиот судија.
Во затворските казни е пресметано и времето поминато во притвор.
По изрекувањето на пресудата Јавниот обвинител Дарко Јакимовски предложи на сега веќе неправосилно осудените да им се продолжи мерката притвор и куќен притвор се’ до започнување на издржување на казната.
„Со оглед на тоа што на обвинетите веќе им е изречена казна но и со оглчед на големината на казните постои опасност истите да избегаат но и да го повторат кривичното дело“, рече Јакимовски.
Адвокатот Кире Стојановски од судот побара притворот на Андреј Мицов да биде заменет со куќен притвор затоа што, како што образложи тој, здравствената состојба на Мицов е лоша за што Стојановски претходно го известил судот и приложил соодветна медицинска документација.
Останатите петмина адвокати изјавија дека нема да се произнесат по предлогот на обвинителот Јакимовски за продолжување на мерките притвор и куќен притвор.
Судот пресуди на петмина од обвинетите да им биде продолжена мерката притвор, а на двајца куќен притвор, како и досега. Обвинетите имаат право на жалба.
За правото на Села да бара оштета судот го упати на покренување парница во граѓанска постапка.