Во обидите за извлекување на дванаесетте момчиња, заглавени во пештера со нивниот тренер, загина нуркач – поранешен припадник на тајландската специјална единица Нејви силс. Властите соопштија дека нуркачот загинал додека работел како волонтер за поставување боци со кислород на потенцијалниот пат за бегство на момчињата. Ветеранот-нуркач Саман Кунан на враќање назад се онесвестил и загинал поради недостиг од кислород, објави Дојче веле.
Ова е прв несреќен случај во напорите да се извлечат децата. Спасувачкиот тим е во трка со времето да ги ослободи момчињата пред да пристигне нова бура. Временскиот прозорец веќе е ограничен, мислевме дека децата ќе можат да останат во пештерата подолго време, но работите се променија, изјави командантот на тајландската воена морнарица, Апакорн Јоконгкаев.
Момчињата-членови на фудбалски клуб се пронајдени живи од страна на нуркачки тим, но мора да чекаат за да бидат спасени од поплавената внатрешност на пештерата. Гувернерот на провинцијата Чианг Раи, Наронгсак Осотанакорн изјави дека нивото на водата во пештерата е сѐ уште премногу високо, а децата се премногу заслабнати за да пливаат или да нуркаат. Тој категорично ги отфрли медиумските извештаи според кои спасувачката акција може да трае со месеци. Британски нуркачи ги открија момчињата на возраст од 11 до 16 години и нивниот тренер доцна синоќа во внатрешноста на пештера на три километри оддалеченост од нејзиниот главен влез. Најголем дел од децата имаат полесни здравствени проблеми, доставени им се лекови и енергетски пијалоци, а еден лекар останал со групата.
Во меѓувреме спасувачите инсталирале телефонска линија во пештерата, изјави гувернерот. Родителите, кои со денови упорно чекаа пред пештерата, веројатно уште од денеска ќе можат да контактираат телефонски со децата. Тоа би бил прв контакт откако групата по својот тренинг на 23. јуни влегла во пештерата Там Луанг-Кун Нам Нанг Нон, очигледно изненадена од нанедејна поплава, притоа сз подлабоко навлегувајќи во внатрешноста на долгата пештера.
Снимките на спасувачите ги прикажуваат децата во светлината на рачните светилки, исцрпени, но среќни. Планирано е децата да добијат нуркачки тренинг за во придружба на спасувачки нуркачи да излезат од поплавениот дел на пештерата. Истовремено се интензивираат напорите за испумпување на водата од пештерата, а се бара и евентуален друг влез во неа.




