Петгодишно дете со посебни потреби и 90 отсто оштетен слух не добило батерии за апаратче за слушање бидејќи неговите родители немале здравствено осигурување без прекин од шест месеци. Неговата мајка по прекинување на работниот однос се пријавила во Агенцијата за вработување но тоа не помогнало а не помогнало ниту тоа што таткото во меѓувреме засновал работен однос и е здравствено осигурен.
„На детето му се вградени импланти и секој месец треба да добива батерии за слушниот апарат за да може да комуницира и да му се развие говорот. Станува збор за детенце од 5 години, кое дури сега почнува да зборува“ вели заменик Народниот правобранител Васка Бајрамовска-Мустафа.
Бајрамовска ја спомена и претставката која ја добиле од човек кој имал мозочен удар, кога бил вработен, но не може да добие паричен надомест за боледување поради тоа што немал шест месеци здравствено осигурување во континуитет.
„Ваквите ограничувања се на штета на граѓаните“ рече заменик народниот правобранител Васка Бајрамовска.
Таа кажа дека веќе доставиле допис до министерот за здравство Венко Филипче и побарале да се измени штетната одредба во Законот за здравствено осигурување, а која ги условува граѓаните со шестмесечно непрекинато здравствено осигурување за остварување на правата за ортопедски помагала но и за други права кои им се гарантирани со закон.
„ Доставивме иницијатива со предлог за преземање мерки за измена на Законот за здравствено осигурување, аналогно на тоа и на Правилникот за користење на ортопедски помагала кој содржи одредба која е на штета на граѓаните и ги условува со шестмесечно непрекинато здравствено осигурување за остварување на права на ортопедско помагало“ кажа Бајрамовска – Мустафа.
Таа рече дека многу често се случува граѓаните, особено децата да бидат оштетени со оваа законска одредба предвидена и во Законот и во Правилникот.