Под мотото „Театар на црвената линија“, од 19 до 26 септември, 38 – от МОТ ќе биде домаќин на 300 гости, а скопската публика ќе одгледа 15 претстави, од 8 различни земји
Со кореографската претстава Тоа што телото на го памети во режија и кореографија на Вим Вандекејбус утревечер 19.09.2013 (четврток) година, во 20:00ч, во Македонската опера и балет (МОБ) се отвара 38-то издание на Млад отворен театар (МОТ 2013). Станува збор за една од најзначајните претстави на белигиската театарската група „ Ултима вез“ оригинално направена во 1987 година и премиерно изведена во Њујорк. Она според кое таа се издвојува е авторската музика на композиторите Тиери де Меј и Питер Вермерш како и кореографијата на Вандекејбус. Поради специфичноста на изразот, критиката на Њујорк Тајмс и Гардијан ја оценуваат претставата како исклучително иновативна и значајна и таа станува огромна сензација која ги поместува границите на театарската уметност на меѓународно ниво.
После исклучително големото внимание и позитивните реакции кои ги предизвика кај публиката во рамките на МОТ 2004 и 2005 година, со претставите Руменило и Исчистени, Вим Вандекејбус по трет пат учествува на фестивалот, овој пат настапувајќи со по 25 години обновената Тоа што телото не го памети.
Отворањето на МОТ 2013 ја има и својата прва театарска премиера во 22:30ч, во Младинскиот културен центар (МКЦ), каде ќе биде изведена претставата Носталгиумот на еден перфориран копиљ (Пу за мене, пу за сите) во режија на Јане Спасиќ што воедно претставува и негова магистарска претстава на постдипломските студии на Факултетот за драмски уметности, Скопје, во класата на проф. Слободан Унковски.
Претставата ја гради млада група на театарџии и три деца кои преку експериментален процес се обидуваат да ги согледаат проблемите на убивањето на „детето во себе“. Учесниците во процесот длабоко нурнуваат во своите сеќавања од детството, сликите на носталгија како и нивното пропаѓање и се обидуваат да состават еден вид хибрид на драмско-перформативна претставата која ќе го покаже влијанието на системот во процесот на созревањето на индивидуата.
„Процесот на создавање на индивудуата не може да се развива и не може да се разгледува оградена од општеството, а ниту оградена од своите потреби. Разните општествени процеси во критичните животни периоди директно влијаеле врз нејзиниот социјален развој. Приказните за „детето во себе“ на целата екипа се еднакво присутни во претставата исто како и приказните на многу млади од Македонија кои се обидовме да ги вметнеме и од нив да створиме универзални приказни за соочувањето на „детето во себе“ при притисокот на општеството и заедницата – вели режисерот Јане Спасиќ.
По премиерата на Спасиќ, отворањето на МОТ ќе се заокружи со концерт на бендот „Летечки пекинезери“ на платото пред МКЦ.
Во рамките на МОТ 2013, од 19 до 26 септември 2013 година во Скопје, ќе се одиграат 15 претстави од кои 9 странски и 6 домашни. Во меѓународниот дел од програмата учество ќе земат претстави од: Белгија, Италија, Турција, Србија, Хрватска и Словенија, во рамките на македонската програма ќе настапат Народниот театар од Битола, Театарот од Куманово и независниот алтернативен театар Вондерленд како и студентите од Факултетот за драмски уметности и Академијата ЕСРА, а ќе следи и втора премиера наМалечката во режија на Сема Али Ерол на 24.09.2013.
Годинешната програма е репрезент на она што е најактуелно и најдобро на регионалната, но и на светската театарска сцена, постојано „натпреварувајќи се“ програмски со регионалните фестивали.