Клиниката за Детски болести не прв пат прима пациенти со дијабет кои се во тешка состојба, информираат од ЈЗУ Клиника за Детски болести по денешното отворено писмо до јавноста на НВО Баланс МК кое откри дека за една недела на оваа клиника биле примени три деца во животна опасност поради „погрешно утврдена дијагноза“.
„На Одделот за Ендокринологија постојано се лекуваат пациенти со оваа дијагноза и се откриваат нови случаи. Токму поради тоа што се работи за сериозно заболување кое може да даде тешка клиничка слика, Здружението на педијатри од септември 2018 година планира да спроведе низа обуки и едукации кај матичните лекари за навремено препознавање на раните симптоми на болеста и првичен третман“, пишува во соопштението од клиниката.
Според податоците на Клиниката за Детски болести во периодот од 17 до 24 јули се хоспитализирани три деца со дијагноза дијабетес. Првиот од нив бил три годишно дете примено во болницата на 17 јули а упатено од матичниот педијатар „по направени првични анализи кои укажувале на дијабет“. По дадената терапија детето е пратено на домашно лекување, велат од клиниката.
Вториот пациент е деветгодишно дете примено во клиниката два дена подоцна. Било пратено од Општата болница во Гевгелија примено со симптоми на дехидратација и првично било стабилизарано во болницата во Гевгелија, но по влошување на состојбата е пратено на дополнителни иследувања на Клиниката за детски болести. По неколкудневен третман состојбата на детето е подобрена. Тоа се уште се наоѓа на скопската клиника за детски болести.
Од Клиниката уште информираат дека третиот пациент е 14 годишно момче од Охрид кое вчера било примено со возило на Брза помош во тешка состојба. Докторите велат дека првичните анализи укажуваат дека момчето боледува од дијабет.
Во тек е процедура во институциите за утврдување дали има пропуст во стручноста во водењето на трите деца со дијабетес тип 1, од Свети Николе, Гевгелија и Охрид, кои во состојба на кетоацидоза се примени во Клиничкиот центар во Скопје, изјави претседателката на Лекарската комора, Калина Гривчева Старделова.
„Првото дете од Свети Николе е примено во добра општа состојба и после неколку дена е испишано. Тоа брзо било препозанено и упатено на Клиника. Второто дете од Гевгелија се уште е на Оддел во Детската клиника. Тоа е донесено во состојба на кетоацидоза, брзо е извлечено од таа состојба и е стабилно. Во тек е процес на едукација на родителите на второто дете за справување со неговата болест“ рече Ставриќ.
Таа додаде дека една третина од децата со новооткриен дијабетес доаѓаат на Клиниката во стостојба на кетоацидоза, состојба опасна по живот.
Асоцијацијата за детски дијабетес на Македонија – Баланс МК денеска преку соопштение објави дека во последнава седмица три деца „поради човечката и пред се’ докторска некомпетентност и незнаење, односно погрешно “утврдени“ дијагнози биле доведени во животна опасност“.
Претседателката на Асоцијацијата за детски дијабетес на Македонија – Баланс МК Наташа Димитриевска рече дека бараат што побрзо да се истражи случајот, бидејќи, според нив, поради погрешно утврдена дијагноза трите деца биле доведени во животна опасност.




