Министерот за здравство Венко Филипче потпишал договор во четири очи, без да распише тендер, за изградба на бункер за акцелератор во Клиничката болница во Штип, дознава НОВА од добро упатени извори во оваа проблематика. Станува збор за договор во вредност од 700 000 евра со грчка фирмата Интеркат која веќе ја гради Клиничката болница, а подизведувач е фирмата Бетон Штип.
Бункерот чии темели беа ставени уште пред четири години, не е составен дел од болницата и неговата изградба не е предвидена во договорот за изградба на болницата(болницата се гради со кредитната линија од Банката на советот на Европа во вредност од 34 милиони евра).
На свеченото сечење ленти кога беа ставени темелите на бункерот во 2014 годинина, тогашниот министер Тодоров најави дека за една година ќе бидат завршени работите. Бункерот е објект со специјално заштитени sидови за да нема зрачење преку нив, а во него треба да биде сметен акцелераторот за зрачна терапија на болните од рак. Но, од тоа не се случи ништо, а изградбата ја следат скандали од самиот почеток.
Во 2015 година, изградбата на бункерот и е доверена на битолската фирма Мак строј која требало објектот да го заврши за една година. Но, работите се развлекоа и поради ненавремено завршување на објектот и пречекорување на рокот, на фирмата и е активирана банкарската гаранција од 100 000 евра. Со тоа запре работата на бункерот.
За тоа време, акцелераторот четири години стои нераспакуван и е надвор од функција. Пациентите болни од рак на зрачење се праќаат на Клиниката за онкологија во Скопје.
Сега, наместо да распише тендер на кој ќе се јават повеќе фирми и ќе има конкуренција во однос на цената и понудениот квалитет, министерот Филипче одлучил изградбата да ја довери на фирмата која ја гради болницата и тоа да го направи со договор во четири очи.
НОВА побара објаснување од Министерството за здравство каде потврдија дека немало тендер, но, велат тие направиле варијација во договор со Банката за развој при Советот Европа (ЦЕБ) и тоа е направено по препорака на Банката следејќи ги и применувајќи ги процедурите и рамките пропишани од банката кредитор.
„Потпишана е варијација за финализирање на градежните работи со фирмата Интеркат од Грција, која е актуелен изведувач на КБ Штип. Имено, бункерот за акцелератор претставува една целина со самата болница и по функција и физички, се наоѓа во рамки на болницата, па согласно горенаведените процедури произлезе и варијацијата, се со цел навремено завршување на целиот проект за изградба и модернизација на регионалната Клиничка болница во Штип.
Согласно процедурите на Банката за развој при Советот Европа од кој кредит се финансира и градбата на болницата и на бункерот, постапено е по правилата за набавка на кредиторот и по претходно добиена согласност од ЦЕБ и потпишана е варијација на договорот со актуелниот градител на КБ Штип, се вели во одговорот на Министерството за здравство.
Од таму потенцираат дека пред оваа постапка, увид бил извршен и од техничка мисија на кредиторот, во рамки на која било утврдено дека двата објекта се функционална целина и дека овој пристап е најсоодветен за истото.
Сепак, упатените во проблематиката велат дека ваква варијација може да се направи само на основниот договор, но бункерот претходно не бил составен дел од тој договор.
„Тендер мора да има без разлика што бункерот ќе се гради со пари од кредитот кој треба да го исплаќаат граѓаните на оваа држава. Тоа што е добиена дозвола од Банката не го амнестира министерот Филипче да распише тендер и преку јавен оглас да се отвори можност да се јават повеќе фирми за да се избере најдобрата понуда. Во спротивно, тоа е кривично дело“, потенцираат извори за НОВА.
НОВА се обрати и Бирото за јавни набавки за да објаснат дали договорот е во согласност со некој сегмент од законот и дали е можно да се склучи договор без тендер, во случај кога не станува збор за донација. Од таму, иако ветија дека ќе испратат одговор, тоа не се случи до објавување на текстот.
Инаку, освен што се влече изградбата на бункерот за акцелераторот доцни и изградбата на Клиничката болница во Штип. Според информации на НОВА во јануари истекува рокот кога треба да биде завршен објектот, а завршени се само 24 отсто од работите. Неофицијално, на фирмата Интеркат и Бетон Штип платено им е однапред за работата проценета во вредност од 34 милиони евра.