Денеска на бирото за јавни набавки осамнаа нови договори склучени кон крајот на Август годинава помеѓу Владата и неколку маркетинг агенции за изработка на три кампањи за информирање на јавноста за нејзините политики. Новите реклами и маркетинг услуги ќе ги чинат граѓаните 1.600.000 евра.
Во договорите од едната кампања објавена на страницата на Бирото се вели дека парите ќе се потрошат „за набавка на услуги за осмислување и реализација на кампања за сеопфатно информирање на граѓаните и здравствените работници, за можностите кои им се на располагање со преземањето активни мерки и имплементацијата на владини политики во здравствениот систем во земјата“. За оваа кампања ќе се потрошат 590.000 евра.
Преку втората кампања која чини 590.000 евра Владата му се обраќа на стопанството. Од агенциите побарала „услуги за осмислување и реализација на кампања за сеопфатно и навремено информирање за можностите кои се на располагање на граѓаните и стопанските субјекти, а кои произлегуваат од спроведувањето на активните мерки и владини политики за поддршка на земјоделскиот сектор во државата“.
И третата кампања за која ќе се потрошат 500.000 евра е наменета за информирање на студентит и граѓаните, односно „набавка на услуги за осмислување и реализација на кампања за навремено и соодветно информирање на граѓаните, училишната и студентска популација, за можностите кои се на располагање со имплементирањето на активните мерки и владини политики во областа на образованието“.
Владата не сакала да штеди на ниту една од кампањите, па така, најголема улога во изборот на понудувач квалитетот со 65 бода, а цената со само 35.