Жива сцена, односно симулација на брод полн со политички затвореници кој плови кон Голи Оток во Музејот на ВМРО е мистериозната поставка за која минатата недела на бирото за јавни набавки се обзнани договорот кој е потпишан помеѓу министерството за култура и фирмата Бетон во висина од 1.4 милиони евра, дознава НОВА.
Извори за НОВА кусо опишаа што ќе содржи поставката, односно дека визуелно сцената ќе биде подвижна, односно „жива“, а бродот на кој ќе бидат качени фигури на политички затвореници ќе симулира движење, односно пловидба кон Голи Оток.
НОВА се обиде да добие потврда од раководството на Музејот, но на телефонските повици во институцијата не одговори никој.
Постапката за набавка на сцената помеѓу фирмата Бетон и Министерството за култура е спроведена со преговарање без претходно објавување на оглас. Според оскудните информации во документот на страницата на Бирото за јавни набавки предвидено е изведбата на работите да заврши за шест месеци.
Зградат на Музејот е првиот отворен објект од проектот Скопје 2014, односно во употреба беше пуштена пред 2 години на прославата на независноста на Македонија. За нејзината изградба беа потрошени 14,7 милиони евра.