Партискиот врв на ВМРО ДПМНЕ синоќа дебатирал за референдумот, но конечна одлука не донел. На седницата на Извршниот комитет која траела 4 часа, дел од членовите ја застапувале тезата дека референдумот треба да се бојкотира затоа што тоа било волјата на мнозинството граѓани, а други настапиле со поумерени позиции – дека ВМРО ДПМНЕ не треба да остане настрана од овој процес и дека треба да повика на гласање.
Член на Извршниот комитет вели дека не „преовладал ниту еден став и сите опции остануваат отворени – бојкот на референдумот, да се повика да се гласа против Договорот со Грција или партијата да не дефинира официјален партиски став туку да остави гласачите сами да одлучат дали ќе гласаат или бојкотираат. Само опцијата – да се повика на рефрендум и да се гласа „За“ е исклучена.
Во атмосфера кога се очекува „притисоците да растат од сите страни“, претседателот на партијата Христијан Мицкоски побарал од сопартијците да се воздржат од објавување на пропагандистички пораки на своите Фејсбук профили, без разлика дали се за „бојкотирам“ или за другата опција, се додека не се дефинира партискиот став.
Повикот се толкува и во контекст на кампањата која ја предводи Јанко Бачев под слоганот „Македонија бојкотира“ и која се оценува дека може да го контаминира целиот процес.
„Во демократска држава секој има право да си го каже своето мислење, но кај нас за жал се случи полициски инсталации и поранешни политичари да го контаминираат повикот за бојкот и чувствата на луѓето кои навистина веруваат во тоа“, коментира партиски функционер за НОВА ТВ.
Според истиот извор, се очекува ВМРО ДПМНЕ да учествува во неформалната кампања за референдумот која веќе е започната. Членови на партијата ќе ги застапуваат тезите дека никој нема право да го монополизира евроинтегративниот процес и да го поистоветува со штетниот Договор, дека Македонија нема гаранција дека ќе стане дел од европското семејство по промената на името и дека власта со распишувањето на консултативен референдум прави алиби и без цензус да го протурка Договорот. И Мицкоски порачал дека членовите на ИК треба почесто да се присутни на дебати.
„Јас верувам во современ гемиџија кој нема да бега од дебати. Модерен Шатев, Александров, Протуѓеров е оној кој кој ке учествува во полемики, ќе им објасни на граѓаните што значи Договорот со Грција, за разлика од оние тастатура – патриоти кои пишуваат само што ќе им нарачаат и платат. Јавноста треба да знае дека ВМРО ДПМНЕ има став за Договорот и имаме аргументи за тоа“ рекол Мицкоски, според нашите соговорници.
Партискиот врв го отворил и прашањето за начинот на кој ќе се следи референдумот со оглед на фактот дека Законот не дозволува партиски набљудувачи да го мониторираат процесот на гласање, туку само претставници на невладини организации и наведуваат дека за партијата нема да бидат прифатливи резултати на оние избирачки места каде излезноста ќе биде 80 или 90 проценти. „Во Зајас не може да има излезност од 90 проценти, ако на претходните избори одѕивот бил околу 45 проценти и тоа да се правда со гласање на дијаспората која покажува веќе покажува слаб интерес да гласа на референдумот“, коментираат од партијата.
Дебата околу референдумот продолжува и денеска на седница на Централниот комитет.